काठमाडौं । गल्फ कप महिला टी-ट्वान्टी क्रिकेटमा बहराइनले साउदी अरबमाथि फराकिलो जित हात पारेको छ ।
मंगलबार ओमानमा भएको खेलमा बहराइनले साउदीलाई २ सय ६९ रनले पराजित गरेको हो ।
दूई दिन अघि महिला क्रिकेटमा डेब्यु गरेको साउदी अरबविरुद्ध बहराइनले २० ओभरमा मात्र १ विकेट गुमाएर ३ सय १८ रन बनायो । महिला टी-ट्वान्टी अन्तरष्ट्रिय क्रिकेटमा बनेको यो सर्वाधिक ठुलो स्कोर हो ।
यसअघि सन् २०१९ मा युगान्डाले मालीविरुद्ध ३ सय १४ रनको सर्वाधिक स्कोरको कीर्तिमान बनाएको थियो । युगान्डाले मालीलाई ३ सय ४ रनको फराकिलो अन्तरले पराजित गर्दै कीर्तिमानी फराकिलो जित आफ्नो नाममा गराएको थियो ।
बहराइनकी दिपिका रसंगिकाले ६६ बलमा १ सय ६१ रनको अविजित इनिङ खेल्दै एक इनिङमा सर्वाधिक रन बनाउने महिला खेलाडीको कीर्तिमान आफ्नो नाम लेखाईन् । पूर्व श्रीलंकाकी खेलाडी दिपिकाले खेलमा ३१ चौका प्रहर गर्दै एक इनिङमा सर्वाधिक चौका प्रहार गर्ने कीर्तिमान समेत आफ्नो नाम गराइन् ।
दिपिकाले ओपनर थरंगा गजनायकेसँग मिलेर दोस्रो विकेटको लागि अविजित २ सय ५५ रनको साझेदारी गर्दै दोस्रो विकेटको लागि सर्वाधिक साझेदारीको कीर्तिमान समेत बनाए । बहराइनकी गजनायकेले ५६ बलमा ९४ रन बनाउँदा रसिका रोड्रोगोले ११ बलमा १३ रनको योगदान गरिन् ।
साउदी अरबकी इमान इजाजले मात्र १ विकेट लिन सफल रहिन् । बहराइनले खेलमा ५० अतिरिक्त रन पाएको थियो । जवाफी लक्ष्य पछ्याएको साउदी २० ओभरमा ८ विकेट गुमाएर ४९ रन मात्र बनायो । साउदी अरबका कुनै पनि खेलाडीले दोहोरो अंक छुन सकेनन् ।
माइरा खानले ४० बलमा सर्वाधिक ९ रन बनाइन् । अमना खानले अविजित ८ रन बनाइन् । बहराइनकी रसाङ्गिकाले ४ ओभरमा ९ रन खर्चेर ३ विकेट हात पारिन् ।
-1738314938.jpg)
