बागमती प्रदेश खेलकुदको खेल तालिका सार्वजनिक 

काठमाडौं । बागमती प्रदेशले प्रदेश स्तरिय खेलकुद प्रतियोगिताको खेल तालिका सार्वजनिक भएको छ । 

हेटौंडास्थित पिप्ले क्याम्पा रंगशालामा मुख्य मन्त्री राजेन्द्र पाण्डेले फाल्गुन २८ गते प्रतियोगिताको उद्घान गर्ने छन ।

मुल आयोजक कमिटिले सार्वजनिक गरिएको खेल तालिका अनुसार मकवानपुरको हेटौंडाले तीन खेलको आयोजना गर्ने अवसर पाएको छ ।

पिप्ले क्याम्पा रंगशालामा फाल्गुन २९ देखि पुरुष फुटबल हुदैछ ।  थानाभर्याङ कभर्डहलमा फाल्गुन  २९ देखिनै व्याडमिन्टन हुने छ, भने  भुटनदेवी स्कुलमा चैत्र ५ देखि तेक्वान्दो हुनेछ ।

त्यस्तै चितवनमा फाल्गुन ३० गते देखि भलिबल र क्रिकेट एकै साथ सुरु हुने छन् । माडी खेल मैदानमा महिला तथा पुरुष भलिबल र  गौतमबुद्ध अन्तर्राष्ट्रिय क्रिकेट मैदानमा महिला तथा पुरुष क्रिकेटका खेलहरु संचालन हुने छन् ।

त्यस्तै काठमाण्डौको दशरथ रंगशालामा चैत्र ६ देखि एथ्लेटिक्स हुने छ । समापन सहित दुई खेलको आयोजना गर्ने अवसर काभ्रले  प्राप्त गरेको छ ।

महिला फुटबल चैत्र ७ देखि धुलीखेल फुटबल मैदानमा शुरु हुने छ, चैत्र ९ देखि काभ्रेपलाञ्चोकमा बक्सिङ हुनेछ । सिन्धुपालञ्चोकमा चैत्र ७ गते देखि कराते शुरु हुनेछ । प्रतियोगिताको समापन चैत्र १२ गते काभ्रेपलाञ्चोकमा हुनेछ ।

प्रतियोगितालाई भब्य,व्यवस्थित र पारदर्शी बनाउन मुल आयोजक समितिका अलवा ६ वटा उपसमिति र ८ वटा प्राविधिक समिति गठन गरिएको छ ।

प्रतियोगितामा महिलातर्फ ९३९ र पुरुषतर्फ १२४९ गरि कुल २१८८ जना खेलाडीले आ–आफ्नो विधामा स्पर्धा गर्ने छन् । अफिसियल र निर्णायकको संख्या ४५६ रहने छ ।

प्रतियोगितामा करिब ८ करोड ४ लाख खर्च हुने अनुमान गरिएको प्रदेश खेलकुद विकास परिषद्का सदस्य सचिव सुर्यलाल भण्डारीले जानकारी गराए ।

प्रतियोगितामा प्रथम, द्धितीय र तृतीय हुनेलाई नगद, शिल्ड र प्रमाणपत्र प्रदान गरिनेछ र प्रत्येक खेलाडीको बिमाको व्यवस्था गरिएको आयोजकले जनाएको छ ।