काठमाडौं । नेपाल अटोमोबाईल्स एसोशिएसन (नासा नेपाल)ले आफ्नो बार्षिक खेल ईभेन्टको प्रोमो सार्वजनिक गरेको छ ।
मोटर स्पोर्टस, अटोमोबाईल मोबिलिटी तथा टुरिजम र रोड सेफ्टिीको क्षेत्रमा विगत १२ वर्षदेखि क्रियाशिल नासा नेपालले आफ्नो वार्षिक क्यालेन्डरमा रहेका ईभेन्टको प्रोमो सार्वजनिक गरेको हो ।
काठमाडौंमा भएको कार्यसमिति, विभागीय समिति तथा सचिवालयको बृहत्त छलफल गरेर नासाले आफ्ना ईभेन्टको प्रोमो र क्यालेन्डर सार्वजनीक गरेको बताएको छ ।
आर्थिक वर्ष ७८-८९ र ८९-८० का लागि नासा नेपालले राष्ट्रिय र अन्तराष्ट्रिय सहभागिता, आयोजना र आबद्धता गरि तीन प्रकारको इभेन्ट समावेश गरेको छ ।
युवामाझ लोकप्रिय रहेको मोटरसाईकल रेसिङ रेसमान्डु, मोटरसाईकलकै अफरोड रेसिङ ईभेन्ट क्रसमान्डु, नेपाल रोड रेस च्याम्पियनसिप जस्ता ईभेन्ट बार्षिक क्यालेन्डरमा रहेका छन् ।
यस्तै, महिला राईडरका लागि लोकप्रिय ईभेन्ट रेसनारी ट्यालेन्ट ट्रफी, नेपाल मोटर स्पोर्टसमा सुहाउँदा र्याली क्रस इभेन्ट माउन्ट एभरेस्ट अटोक्रस तथा नेपालकै मोटर स्पोर्टसको विश्वव्यापी पहिचान बनाउन सक्ने ट्रान्स–हिमालयन एडभेन्चर समेत तयार गरिएको छ ।
नासा नेपालकै पहिलो मोटरिङ ईभेन्ट सिन्सियर सिटिजन मोटर र्यालीलाई यस पटकदेखि टुरमान्डुको नयाँ ब्राण्डको रुपमा आयोजना गरिने आयोजकले जनाएको छ ।
नेपाली ड्राइभरले एसिया प्यासिफिकमा राम्रो छाप छाडेको अटो जिमखानाका केही ईभेन्टलाई नेपाल अटो जिमखाना च्याम्पियनसिपको नाममा परिमार्जन गरि सञ्चालन गरिने भएको छ । जसको विजेतालाई एसिया प्यासिफिक अटो जिमखानामा सहभागी गराईने नासा नेपालद्धारा जारी बिज्ञप्तिमा उल्लेख गरिएको छ ।
