कृष्ण प्रसाद भट्टराई स्मृति कराते चैतमा   

काठमाडौं । पहिलो संस्करणको कृष्ण प्रसाद भट्टराई स्मृति राष्ट्रिय कराते प्रतियोगिता चैतमा आयोजना हुने भएको छ ।

नेपाल कराते महासंघको तत्वावधान तथा नेपाल लोकतान्त्रिक खेलकुद संघ र जिल्ला प्रमुख डोजो ललितपुरले शनिबार पत्रकार सम्मेलन गर्दै प्रतियोगिता चैतको २४ देखि २६ गतेसम्म हुने जनाएको छ ।

प्रतियोगितामा सात प्रदेश र तीन विभागीय टोली (नेपाल आर्मी, नेपाल प्रहरी र एपीएफ) गरी १० टिमको सहभागिता रहने छ ।

महिलामा १० तौल समूह ४५,५०,५५,६१,६८ केजी तौल मुनि र ६८ तौल माथिको एकल काता र टिम कातामा प्रतिस्पर्धा हुनेछ ।

पुरुषमा ५०,५५,६०,,६७,७५,८४ केजी तौल मुनि र ८४ केजी माथि एकल काता र टिम कातामा प्रतिस्पर्धा हुनेछ  ।

एकल र टिम कातासहित पुरुषमा ११ तथा महिलामा १० गरी २१ स्पर्धामा प्रतिस्पर्धा हुने छ । पुरुषमा १ सय १० र महिलामा १ सय गरी २ सय १० खेलाडीको सहभागिता रहने छ ।

टिम च्याम्पियनलाई १ लाख नगद पुरस्कार दिइने छ भने उत्कृष्ट पुरुष÷महिला खेलाडीलाई पनि नगदबाट पुरस्कृत गरिने आयोजकले जनाएको छ ।

नेपाल कराते महासंघका कार्यवाहक अध्यक्ष दावा गुरुङले यसै प्रतियोगिताबाट चीनमा हुने १९ औं एसियाली खेलकुदका लागि खेलाडीको प्रारम्भिक छनोट गरिने बताए ।

करातेका प्रमुख प्रशिक्षक हीरासिंह डंगोलले प्रत्येक तौलसमूहबाट ४ खेलाडीका दरले २१ स्पर्धामा ८४ खेलाडीको प्रारम्भि छनोट गरिने बताए ।

राष्ट्रिय खेलकुद परिषद्का पूर्व कोषाध्यक्ष समेत रहेका प्रतियोगिताका मुख्य योजनाकार मिनकृष्ण महर्जनले कोभिडले सुस्ताइ रहेको खेलकुदलाई चलायमान बनाउन प्रतियोगिताले मद्दत पुग्ने बताउदै खेलाडीको मनोबल उकास्न पनि प्रतियोगिता सहयोगी साबित हुने विश्वास व्यक्त गरे ।

प्रायोजक लिनिङका कार्यकारी प्रमुख राजन महर्जन र सम्झना ल्याबका कार्यकारी प्रमुख उर्दिप जोशीले प्रायोजनले आगामी दिन पनि निरन्तरता पाउने प्रतिबद्धता व्यक्त गरे । प्रायोजन सम्बन्धी जानकारी छुट्टै पत्रकार सम्मेलन आयोजना गरी जानकारी गराइ आयोजक डोजोका अध्यक्ष श्रेष्ठले अवगत गराए ।

पत्रकार सम्मेलनमै आयोजक डोजोका सचिव विनोद श्रेष्ठलाई सह–संयोजकमा मनोनयन गरिएको जानकारी दिइयो ।

प्रतियोगिता संयोजक आठौं दक्षिण एसियाली खेलकुद (साग) अन्तर्गत करातेका स्वर्ण विजेता रवि महर्जनले विनोदलाई सह–संयोजकमा मनोनयन गरिएको पत्र हस्तान्तरण गरेका थिए ।

प्रतियोगिताका खेलहरु सातदोबाटोस्थित अन्तर्राष्ट्रिय खेलकुद परिसर हातामा रहेको कराते हलमा हुनेछ ।