पीएम कप : एपीएफको शतप्रतिशत नतिजा 

काठमाडौं । नेपाल एपीएफ क्लबले पीएम कप टी–ट्वान्टी राष्ट्रिय क्रिकेट प्रतियोगिता अन्तर्गत समूह चरणका चारवटै खेल जित्दै शतप्रतिशत नतिजा निकालेको छ । 

समूह ‘बी’ अन्तर्गत मुलपानी क्रिकेट मैदानमा लुम्बिनी प्रदेशलाई ७ विकेटले पराजित गर्दै एपीएफले लगातार चार खेल जितेको हो । 

एपीएफले आठ अक जोड्दै समूह विजेताको रुपमा सेमिफाइनलमा प्रवेश गरेको छ । 

यता लुम्बिनीको भने यो तीन खेलमा दोस्रो पराजय हो । यस अघि लुम्बिनी पहिलो खेलमा बागमती प्रदेशसँग ४९ रनले पराजित भएको थियो । तर दोस्रो खेलमा प्रदेश २ लाई ४२ रनले हराएको थियो । 

शुक्रबारको खेलमा लुम्बिनी प्रदेशले दिएको १ सय ५ रनको लक्ष्य एपीएफले ११ ओभरमा ३ विकेट गुमाएर पुरा गर्यो ।

एपीएफका आसिफ शेखले २६ बलम ४३ रनको योगदान गरे । आसिफले चार चौका र तीन छक्का हिर्काए ।  

प्रदिप ऐरीले २० बलमा ३६ रन बनाए । उनले दुई चौका र चार छक्का प्रहार गरे ।      

लुम्बिनीका बसिर अहमदले दुई तथा सिद्धान्त शाहीले एक विकेट लिए । 

यस अघि टस हारेर पहिले ब्याटिङ गरेको लुम्बिनीले निर्धारित २० ओभरमा ९ विकेट गुमाउदै १ सय ४ रन जोड्यो । 
लुम्बिनीका लागि देव खनालले सर्वाधिक ४३ रनको योगदान गरे । 

सुशान्त थापाले १८ रन जोडे । 

एपीएफका लागि कमल ऐरी, किशोर महतो, अविनाश बोहरा र दिपक बोहराले समान दुई–दुई विकेट लिए । 

शरद भेषावकरले एक विकेट हात पारे ।