काठमाडौं । लगातार तीन खेल जित्दै पीएम कप टी–ट्वान्टी राष्ट्रिय क्रिकेट प्रतियोगिताको सेमिफाइनल पुगेको छ ।
समूह ‘ए’ अन्तर्गत टियु क्रिकेट मैदानमा कर्णाली प्रदेशमाथि ८९ रनको जित दर्ता गर्दै पुलिसले प्रतियोगितामा तेस्रो जित दर्ता गरेको हो ।
पुलिस समूह विजेता बन्दै सेमिफानलमा प्रवेश गरेको हो ।
पुलिसले यस अघि सुदुरपश्चिमलाई २ रन तथा त्रिभुवन आर्मी क्लबलाई ४ विकेटले पराजित गरेको थियो ।
यता कर्णालीको यो चार खेलमा तेस्रो पराजय हो । तीन खेलमा पराजय भोगेको कर्णालीको सेमिफाइनल प्रवेश गर्ने सम्भावना टुंगिएको छ ।
यस अघि कर्णालीले आर्मी र सुदुरपश्चिमविरुद्ध पराजय भोगेको थियो भने प्रदेश नं. १ माथि जित हात पारेको थियो ।
पुलिसले दिएको २ सय ४५ रनको विशाल लक्ष्य पछ्याउने क्रममा कर्णाली निर्धारित २० ओभरमा ९ विकेट गुमाउदै १ सय ५५ रन मात्र जोड्न सक्यो ।
कर्णालीका लागि प्रकाश जैसीले सर्वाधिक ६८ रनको योगदान गरे । उनले ४७ बलमा ६ चौका र ३ छक्का हिर्काएका थिए ।
कर्णालीविरुद्ध पुलिसका ९ खेलाडीले बलिङ गरेका थिए । जसमध्ये ६ खेलाडीले विकेट लिए ।
जसमध्ये योगेन्द्र सिंह कार्की र दिपेन्द्र सिंह ऐरीले दुई–दुई विकेट हात पारे ।
पवन सर्राफ, कुशल भुर्तेल, करण केसी, गुल्सन झाले एक–एक विकेट लिए ।
यस अघि टस जितेर पहिले ब्याटिङ गरेको पुलिसले निर्धारित २० ओभरमा ६ विकेट गुमाउदै २ सय ४४ रन बनायो ।
पुलिसका लागि ओपनर कुशल भुर्तेलले विस्फोटक ब्याटिङ गर्दै ३९ बलमा सर्वाधिक ८२ रनको योगदान गरे ।
कुशलले ९ चौका र ३ छक्का प्रहार गरे ।
यता दिपेन्द्र सिंह ऐरीले २८ बलमा ६२ रन बनाए । उनले ९ चौका र २ छक्का हिर्काए ।
कर्णालीका अनुज चुनारा, प्रकाश जैसी र रविन्द्र शाहीले समान दुई–दुई विकेट लिए ।
