उज्वेकिस्तानमाथि नेपालको उत्कृष्ट जित

काठमाडौं । नेपालको पुरुष टोलीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा पहिलो जित निकालेको छ ।

बंगलादेशको ढाकामा शुक्रबार उज्वेकिस्तानलाई ३-१ को  सेटमा हराउँदै नेपालले पहिलो जित निकालेको हो ।

बलियो टिम उज्वेकिस्तानविरुद्ध नेपालले पुनरागमन गर्दै उत्कृष्ट जित निकालेको हो ।

रोमान्चक खेलको पहिलो सेट नेपालले २५-१८ ले गुमाएको थियो । तर, त्यसपछिको तीन सेट नेपालले लगातार जित्यो ।

नेपालले दोस्रो सेट २५-२१,  तेस्रो सेट २५-२१ र चौंथो सेट २५-२३ ले आफ्नो बनाउँदै पहिलो जित निकालेको हो ।

खेलमा नेपालका धन बहादुर प्लेयर अफ दि म्याच चुनिए ।

यस अघि बिहीबार भएको पहिलो खेलमा नेपाल आयोजक बंगलादेशसँग ३-० को सोझो सेटमै पराजित भएको थियो ।

अब नेपालले तेस्रो खेलमा शनिबार श्रीलंका र अन्तिम खेलमा आइतबार माल्दिभ्सको सामना गर्नेछ ।

पुरुषतर्फ ५ टिमको सहभागिता रहेको छ । राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्ने छन् ।

यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्ने छन् ।

महिलातर्फ नेपालले लगातार दोस्रो जित निकालेको छ ।

शुक्रबार नेपालले माल्दिभ्सलाई ३-० को सेटमा हराएर लगातार दोस्रो जित निकालेको हो ।

महिलाको पहिलो खेलमा नेपालले श्रीलंकालाई ३-२ को सेटमा हराएको थियो ।