काठमाडौं । नेपालको महिला भलिबल टोलीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा विजयी सुरुआत गरेको छ ।
बंगलादेशको ढाकामा बिहीबार श्रीलंकालाई ३-२ को सेटमा पराजित गर्दै नेपालले सुखद सुरुआत गरेको हो ।
साविक विजेता समेत रहेको नेपालले सुरुआती दुई सेट गुमाए पनि उत्कृष्ट पुनरागमन गर्दै जित निकालेको हो ।
प्रतिस्पर्धात्मक बनेको खेलको सुरुआती दुई सेट श्रीलंकाले २५-१९ र २५-२१ ले जितेको थियो ।
तर, त्यसपछिको दुई सेटमा नेपालले २५-१५ र २५-१५ को सेटमा जित निकाल्यो ।
त्यसपछि अन्तिम सेटमा श्रीलंकालाई १५-१३ को सेटमा हराउँदै नेपालले सुखद सुरुआत गरेको हो ।
अब नेपालले शुक्रबार माल्दिभ्ससँग प्रतिस्पर्धा गर्नेछ ।
पुरुष टोलीले आज आयोजक बंगलादेशसँग प्रतिस्पर्धा गर्नेछ । नेपाल र आयोजकबीचको खेल दिउसो ४:४५ बजे सुरु हुनेछ ।
प्रतियोगितामा पुरुषतर्फ ५ र महिलातर्फ ६ राष्ट्रले सहभागिता जनाएका छन् ।
पुरुषमा आयोजक बंगलादेश, नेपाल, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।
महिलामा आयोजक बंगलादेश, नेपाल, किर्गिस्तान, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।
राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछ ।
यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्नेछ ।
