सेन्ट्रल जोन भलिबल : नेपालको खेल आज

काठमाडौं । एसियन सिनियर सेन्ट्रल जोन पुरुष तथा महिला भलिबल च्यालेन्ज कप आज बिहीबारबाट बंगलादेशमा सुरु हुँदैछ ।

बंगलादेशको ढाकामा आयोजना हुने प्रतियोगितामा नेपालको महिला र पुरुष टोलीले सहभागिता जनाएका छन् ।

नेपालको महिला टोलीले पहिलो खेलमा आज श्रीलंकाको सामना गर्नेछ । नेपाल र श्रीलंकाबीचको खेल बिहान सवा ११ बजे सुरु हुनेछ ।

यस्तै पुरुष टोलीले आज आयोजक बंगलादेशसँग प्रतिस्पर्धा गर्नेछ । नेपाल र आयोजकबीचको खेल दिउसो ४:४५ बजे सुरु हुनेछ ।

प्रतियोगितामा पुरुषतर्फ ५ र महिलातर्फ ६ राष्ट्रले सहभागिता जनाएका छन् ।

पुरुषमा आयोजक बंगलादेश, नेपाल, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

महिलामा आयोजक  बंगलादेश, नेपाल, किर्गिस्तान, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछ ।

यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्नेछ ।

महिलातर्फ नेपाल साविक विजेता हो ।

पुरुषतर्फ नेपाल समूह चरणबाट बाहिरिएको थियो ।