काठमाडौं । बंगलादेशको ढाकामा आयोजना हुने एसियन सिनियर सेन्ट्रल जोन पुरुष तथा महिला भलिबल च्यालेन्ज कप अन्तर्गत पुरुषतर्फको खेल तालिका परिवर्तन भएको छ ।
यस अघि नआउने भनिएको माल्दिभ्सले प्रतियोगितामा सहभागिता जनाउने भएपछि पुरुषतर्फको खेल तालिका परिवर्तन भएको हो ।
पुरुषतर्फ ५ टिमले प्रतिस्पर्धा गर्ने छन् । पुरुषमा आयोजक बंगलादेश, नेपाल, श्रीलंका, माल्दिभ्स र उज्वेकिस्तानले प्रतिस्पर्धा गर्नेछन् ।
खेल तालिका परिवर्तन भएसँगै नेपालले पहिलो खेलमा बंगलादेशसँग खेल्ने भएको छ । नेपाल र बंगलादेशबीचको खेल भोलि (बिहीबार) हुनेछ ।
यस्तै नेपालले दोस्रो खेलमा उज्वेकिस्तान, तेस्रो खेलमा श्रीलंका र अन्तिमम खेलमा माल्दिभ्ससँग खेल्नेछ ।
राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्ने छन् ।
यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्ने छन् ।
महिलातर्फ नेपालले बिहीबार श्रीलंकाविरुद्ध खेल्नेछ ।
