काठमाडौं । अखिल नेपाल फुटबल संघ (एन्फा) र लिग फुटबलमा आबद्ध रेफ्रीबीच सहमती बनेको छ ।
फिटनेस टेष्टको विषयलाई लिएर सहिद स्मारक ए डिभिजन लिग खेलाईरहेका १० रेफ्रीले एन्फा समक्ष सामूहिक राजीनामा दिएका थिए ।
लिगको दौरान फिटनेस टेष्ट लिने एन्फाको निर्णय व्यवहारिक नभएको भन्दै रेफ्रीहरुले राजीनामा दिएका थिए ।
रेफ्रीका प्रतिनिधि र एन्फा अध्यक्ष कर्माछिरिङ शेर्पाबीच बिहीबार रातिनै छलफल भएको थियो ।
छलफलमा रेफ्रीको फिटनेस टेष्ट लिगको बिश्रामको समय गर्ने सहमती भएसँगै रेफ्रीहरु मैदान फर्कन तयार भएका हुन् ।
पछिल्लो सहमतीसँगै सामूहिक राजीनामा दिएका रेफ्री मैदान फर्कन तयार भएका छन् । उनीहरु शुक्रबार सुरु हुने लिगको तेस्रो चरणको खेलमा मैदानमा देखिनेछन् ।
‘खासै ठुलो समस्या छैन । प्रतियोगिताको दौरान फिटनेस टेष्ट दिदाँ समस्या हुने रेफ्री साथीहरुको गुनासो छ । एन्फाले खेलको विश्रामको समय टेष्ट लिने बताएको छ । लिगका खेल नखेलाउने भन्ने हुदैन ।’ समस्या समाधानको मध्यस्थता गरिरहेका एक रेफ्रीले खेलपाटीसँग भने ।
अन्तराष्ट्रिय नियम अनुसार रेफ्रीले तीन-तीन महिनामा फिटनेस टेष्ट दिनुपर्ने व्यवस्था छ । तर लिगको दौरान फिटनेस टेष्ट दिदाँ आफुहरुले चोट बोक्नुपर्ने र प्रतियोगिता सञ्चालन गर्न मानसिक र शारीरिक रुपमा समस्या हुने रेफ्रीको गुनासो छ ।
रेफ्रीको मुख्य समस्या भारतीय मुलका रेफ्री डिरेक्टर गौतम कौरसँग रहदै आएको छ ।
नेपाली रेफ्री निर्देशक कौरसँग असन्तुष्ट छन् । कडा स्वभावका कौरको कार्यशैली रेफ्रीहरुले मन पराएका छैनन् ।
लिगकै दौरान फिटनेस टेष्ट गराउने एन्फा र रेफ्री निर्देशकको निर्णयप्रति असन्तुष्टि जनाउँदै फिफा रेफ्री र असिस्टेन्ट रेफ्रीले सामूहिक राजीनामा दिएका हुन् ।
