काठमाडौं । युवा तथा खेलकुद मन्त्रालयले राष्ट्रिय खेलकुद परिषद्को सदस्य सचिवको रुपमा तीन जनाको नाम मन्त्रीपरिषद्मा पठाएको छ ।
युवा तथा खेलकुद मन्त्री महेश्वर गहतराजले सदस्य सचिव सिफारिस समितिले सिफारिस गरे अनुसार तीन जनाको नाम मन्त्रीपरिषद्मा लगेका हुन् ।
खेलकुद मन्त्री गहतराजले सदस्य सचिवका लागि टंकलाल घिसिङ, अच्युतम लामिछाने र ममता श्रेष्ठको नाम मन्त्रपरिषद् बैठकमा प्रस्तुत गरेका छन् ।
सदस्य सचिव सहितको एजेण्डामा निर्णय गर्न मन्त्रीपरिषद्को बैठक सोमबार बसिरहेको छ ।
सिफारिस समितिले एक महिला सहित तीन जनाको नाम सदस्य सचिवको रुपमा सिफारिस गर्ने प्रावधान राष्ट्रिय खेलकुद विकास ऐनमा छ ।
समितिले सिफारिस गरेका तीन जनाको नाम मन्त्रालयले मन्त्रीपरिषद्मा पेश गर्नुपर्ने ऐनमा उल्लेख गरिएको छ ।
मन्त्रालयले सिफारिस गरेका तीन जनामा उपयुक्त पात्रलाई मन्त्रीपरिषद्ले नियुक्त गर्नेछ ।
स्रोतका अनुसार माओवादी केन्द्रका नेता तथा नेपाल रग्बी संघका अध्यक्ष टंकलाल घिसिङलाई सदस्य सचिव बनाउने सरकारको तयारी छ ।
सदस्य सचिवका लागि १८ जनाले दर्खास्त हालेका थिए । सिफारिस समितिले आईतबार सबै निवेदकको कार्ययोजना हेरेर तीन जनाको नाम मन्त्रालयमा सिफारिस गरेको हो ।
मन्त्रीपरिषद्ले आजै सदस्य सचिवको नियुक्ति गर्ने मन्त्रालय स्रोतले बताएको छ ।
