काठमाडौं । आसन्न ए डिभिजन लिग केही दिन पर सरेको छ ।
अखिल नेपाल फुटबल संघ (एन्फा)ले कात्तिक २९ गतेका लागि तय लिगकाे मिति ४ दिन पर सारेको हो ।
यस सिजनको लिग मंसिर ३ गतेबाट सुरु हुने भएको छ ।
अब लिगका खेलहरु शुक्रबार, शनिबार र आईतबार मात्र खेलिने एन्फाले जनाएको छ ।
‘क्लबसँगको सल्लाहमा सप्ताहको अन्तिम तीन दिन लिगका खेल गर्ने भएपछि मिति केही दिन सरेको हो । अब लिगको सबै खेल शुक्रबार, शनिबार र आईतबार मात्र हुनेछ ।’ महासचिव इन्द्रमान तुलाधरले खेलपाटीसँग भने ।
एन्फाको अनुसार अर्को शुक्रबार मात्र लिग सुरु हुनेछ । उद्घाटन खेलमा सातदोबाटो युथ र फ्रेन्ड्स भिड्ने छन् ।
एन्फाले बिहीबार मात्र लिगको प्रत्यक्ष प्रशारणका लागि कान्तिपुर टिभीसँग औपचारिक सम्झौता गरेको छ ।
‘प्रत्यक्ष प्रशारणको तयारीका लागि केही दिन टिभीले समेत मागेको र क्लबले समेत हप्तामा एक राउण्ड मात्र बिदाको दिन खेल गर्ने सहमती गरेकाले लिगकाे मिति सरेको हो ।’ तुलाधरले भने ।
