कान्तिपुर टिभीलाई लिगको प्रशारण अधिकार

कठमाडौं । कतार एयरवेज शहीद स्मारक ए डिभिजन लिगको प्रत्यक्ष प्रशारण कान्तिपुर टेलिभिजनले गर्ने भएको छ ।

कान्तिपुरले एन्फासँग एक बर्षका लागि लिगको प्रशारण अधिकार लिएको हो ।

बिहीवार सम्झौता पत्रमा एन्फाका महासचिव इन्द्रमान तुलाधर र कान्तिपुर टेलिभिजिनका मार्केटिङ म्यानेजर गौरी दाहालले हस्ताक्षर गरे ।

अखिल नेपाल फुटबल संघ एन्फाको आयोजनामा हुने प्रतियोगिता कात्तिक २९ गते सुरु हुदैछ । ए डिभिजन लिग विभिन्न चारवटा मैदानमा गर्ने तयारी गरिएको छ । कान्तिपुर टेलिभिजनबाट त्रिपुरेश्वरस्थित दशरथ रंगशालामा हुने खेलहरु प्रत्यक्ष प्रशारण हुने छ ।

ए डिभिजन लिगमा १४ टिमले सहभागिता जनाउँदै छन् । लिगको उद्घाटन खेलमा दशरथ रंगशालामा फ्रेण्ड्स क्लब र सातदोवाटो युथ क्लब आमने सामने हुनेछन् ।