काठमाडौं । राष्ट्रिय खेलकुद परिषद (राखेप)को सदस्य सचिवको जिम्मेवारी विष्णु राज ढकाललाई दिईएको छ ।
युवा तथा खेलकुद मन्त्रालयको मन्त्रीस्तरीय निर्णयबाट ढकाललाई निमित्त सदस्य सचिवको जिम्मेवारी तोकिएको मन्त्रालयले जनाएकाे छ ।
युवा तथा खेलकुद मन्त्री महेश्वरजंग गहतराजको अध्यक्षतामा मंगलबार बसेको मन्त्रीस्तरीय बैठकले खेलकुद बिकास ऐन २०७७ को दफा १७ को उपदफा १२ बमोजिम मन्त्रालयका सहसचिव ढकाललाई अर्को ब्यवस्था नहुदाँसम्मका लागि राखेपको सदस्य सचिवको जिम्मेवारी दिएकाे हाे।
राष्ट्रिय खेलकुद विकास ऐनको धारा १७ को उपधारा १२ ले कुनै कारणले सदस्य सचिवको पद रिक्त भएमा वा कुनै कारणले निलम्बन भएमा अर्को सदस्य सचिव नियुक्ति वा निजको निलम्बन फुकुवा नभएसम्मको लागि मन्त्रालयले संघीय निजामती सेवाको राजपत्रांकित प्रथम श्रेणीको कर्मचारी वा परिषद्को वरिष्ठतम् कर्मचारीलाई सदस्य सचिवको रुपमा कामकाज गर्ने गरी तोक्ने सक्ने उल्लेख छ ।
गत कात्तिक १ गते सरकारले राखेप सदस्य सचिव रमेश कुमार सिलवाललाई पदबाट मुक्त गरेको थियो ।
सदस्य सचिवलाई बर्खास्त गरेसँगै राखेप कार्यकारी विहीन अवस्थामा थियो ।
मन्त्रालयले मंगलबारमात्र खेलकुद मन्त्रालयका सह–सचिव ढकाललाई निमित्तको जिम्मेवारी दिएर राखेप पठाएको हो ।
ढकालले नयाँ सदस्य सचिव नियुक्त नहुन्जेल राखेपको दैनिक प्रशासन सञ्चालन गर्नेछन् ।
खेलकुद मन्त्रालयले नयाँ सचिव आउने बित्तिकै राखेपको सदस्य सचिव नियुक्ति प्रक्रिया अघि बढाउने बताएको छ ।
तर प्रधानमन्त्री शेरबहादुर देउवाको लण्डन भ्रमणका कारण मन्त्रालयमा सचिव ल्याउन समस्या भईरहेको छ ।
प्रधानमन्त्री देउवा बिहिबार नेपाल फर्कने कार्यक्रम रहेको छ ।
खेलकुद मन्त्री गहतराजले सचिव आउने बित्तिकै राखेप सदस्य सचिव नियुक्ति प्रक्रिया ऐनको व्यवस्था अनुसार अघि बढ्ने बताएका छन् ।
