काठमाडौं । नेपाल ओकिनावा सुरिकेन सोरिनरियो कराते संघले आफ्ना अन्तर्राष्ट्रिय पदक विजेता खेलाडीलाई बिहीबार नगदसहित सम्मान गरेको छ ।
सिंगापुर अन्तर्राष्ट्रिय कराते च्याम्पियनसिपका कांस्य विजेताद्वय आर्यन रन्जित र सागर शाही तथा थाइल्यान्ड ओपन कराते च्याम्पियनसिपकी रजत विजेता कृति गौतम र कांस्य विजेता डिगम्बरप्रसाद पन्तलाई सम्मान गरियो ।
सोही अवसमा गत साता भक्तपुरमा भएको विद्या आर्जन उपत्यकाव्यापी कराते तथा किक बक्सिङ प्रतियोगिताको कुमुते ५० केजीमा स्वर्ण जित्नुका साथै उत्कृष्ट खेलाडी घोषित भएकी आयुष तामाङ पनि सम्मानित भइन् ।
पाँचैलाई संघका उपाध्यक्ष रोशन विष्टले जनही ५ हजार नगद प्रदान गरे । पाँचै पदक विजेतालाई संघका सल्लाहकार एवं नेपाल भारोत्तोलन संघका उपाध्यक्ष रामकृष्ण श्रेष्ठले ७ हजार मुल्य बराबरको ब्याग पनि प्रोत्साहन स्वरुप प्रदान गरेका थिए ।
त्यस्तै कलिलै उमेरमा अन्तर्राष्ट्रिय पदक जिते वापत ८ वर्षिय आर्यनलाई संघका उपाध्यक्ष किशनराज सिंहले नगद २० हजार प्रदान गरे । संघका सदस्य अच्यूत लामिछानेले पनि प्रोत्साहन स्वरुप आर्यनलाई ५ हजार नगदबाट पुरस्कृत गरे ।
राष्ट्रिय खेलकुद परिषद्का सदस्य–सचिव केशवकुमार विष्ट, संघका अध्यक्ष सञ्जय रन्जितलगायतले उनीहरुलाई सम्मान गरेका थिए । सोही अवसरमा नेपाल रेफ्री काउन्सिलका संयोजक राजेन्द्र कपाली र सह–संयोजक महेश रन्जित तथा सल्लाहकार रामकृष्ण श्रेष्ठलाई पनि सम्मान गरिएको थियो ।
