पोखरा । स्पोर्ट्स क्यासल पोखराले राष्ट्रिय 'ए' डिभिजन फुटसल लिगको उपाधि जितेको छ ।
पोखराको बहूदेशीय कभर्डहलमा शुक्रबार भएको फाइनलमा संखमुल फुटसललाई ४-२ गोल अन्तरले परजित गर्दै स्पोर्ट्स क्यासल पहिलो संस्करणको च्याम्पियन बनेको हो ।
स्पोर्ट्स क्यासललाई उपाधि दिलाउन किशोर गुरुङले ह्याट्रिक गोल गरे । विजय गुरुङको नाममा एक गोल रह्यो ।
संखमुलका लक्ष्मण थापा मगर र मणि लामाले एक एक गोल फर्काए ।
उपाधिसँगै स्पोर्ट्स क्यासलले नगद १० लाख प्राप्त गरेको छ ।
उपविजेता बनेको संखमुलले ५ लाख प्राप्त गरेको छ ।
पहिलो संस्करणको लिगमा १० टोलीले प्रतिस्पर्धा गरेका थिए ।
