पोखरा । स्पोर्ट्स क्यासल पोखरा राष्ट्रिय 'ए' डिभिजन फुटसल लिगको फाइनलमा प्रवेश गरेको छ ।
पोखराको बहूदेशीय कभर्डहलमा बुधबार भएको पहिलो क्वालिफायरमा द राइजिङ क्लब धरानलाई ८-६ गोल अन्तरले पराजित गर्दै स्पोर्ट्स क्यासल फाइनल पुगेको हो ।
रोमान्चक बनेको खेलमा स्पोर्ट्स क्यासललाई जित दिलाउन किशोर गुरुङ र सुमित श्रेष्ठले ह्याट्रिक गोल गरे । सुरज गुरुङ र विजय गुरुङले एक एक गोल गरे ।
राइजिङका हेमन्त थापा मगर, सुदिप गुरुङ र मिलन राईले दुई दुई गोल गरे ।
खेलमा म्यान अफ दि म्याच स्पोर्ट्स क्यासलका किशोर गुरुङ चुनिए ।
अब राइजिङले फाइनल प्रवेशको लागि एलिमिनेटरको विजेतासँग दोस्रो क्वालिफायर खेल खेल्नेछ ।
एलिमिनेटरमा संखमुल फुटसल र सबिन मेमोरियल एफसीबीच आजै प्रतिस्पर्धा हुनेछ।
यस खेलको विजेताले दोस्रो क्वालिफायरमा स्थान बनाउने छन् । पराजित हुने टिम बाहिरिनेछ ।
फुटसल लिगको विजेताले १० लाख प्राप्त गर्दा उपविजेताले ५ लाख पाउने एन्फाले जनाएको छ।
यस्तै उत्कृष्ट गोलकिपर, उत्कृष्ट विंगर, उत्कृष्ट डिफेन्डर, उत्कृष्ट प्रशिक्षक र इमर्जिङ खेलाडीले समान २५ हजार पाउने एन्फाले जनाएको छ।
