पोखरा । स्पोर्ट्स क्यासल पोखराले राष्ट्रिय 'ए' डिभिजन फुटसल लिगमा जित निकालेको छ ।
पोखराको बहूदेशीय कभर्डहलमा शनिबार भएको खेलमा स्पोर्ट्स क्यासलले फुटसल फाइभ धरानलाई ३-२ गोल अन्तरले पराजित गरेको हो ।
स्पोर्ट्स क्यासलको जितमा सुरेन बुढा मगर, सुमित श्रेष्ठ र अन्जन देवकोटाले एक एक गोल गरे ।
फुटसल फाइभका किरण चौधरीले दुई गोल फर्काए ।
प्रतिस्पर्धात्मक बनेको खेलमा फुटसल फाइभका धिरज तामाङ, सुजन खड्का, प्रशिक्षक विश्वास लामा र टिम म्यानेजर जीवन आले मगरलाई रेड कार्ड देखाईएको थियो ।
खेलमा स्पोर्ट्स क्यासलका विश्वास पौडेल म्यान अफ दि म्याच चुनिए ।
यस जितसँगै स्पोर्ट्स क्यासलले अपराजित यात्रा कायम राखेको छ ।
स्पोर्ट्स क्यासलले ८ खेलमा २२ अंक जोडेर शीर्ष स्थान कायमै राखेको छ ।
फुटसल फाइभ १४ अंक जोडेर चौंथो स्थानमा रहेको छ ।
लिगमा १० टिमले प्रतिस्पर्धा गरिरहेका छन् ।
फुटसल लिगको विजेताले १० लाख प्राप्त गर्दा उपविजेताले ५ लाख पाउने एन्फाले जनाएको छ ।
यस्तै उत्कृष्ट गोलकिपर, उत्कृष्ट विंगर, उत्कृष्ट डिफेन्डर, उत्कृष्ट प्रशिक्षक र इमर्जिङ खेलाडीले समान २५ हजार पाउने एन्फाले जनाएको छ ।
