पोखरा । राष्ट्रिय 'ए' डिभिजन फुटसल लिगमा आज शुक्रबार पोखराका दुई टोलीबीच प्रतिस्पर्धा हुँदैछ ।
पोखराको बहूदेशीय कभर्डहलमा आज हुने डर्बी भिडन्तमा स्पोर्ट्स क्यासल पोखरा र सबिन मेमोरियल एफसीबीच प्रतिस्पर्धा हुनेछ । पोखरा डर्बी भिडन्त दिउँसो १२:३० बजे सुरु हुनेछ ।
सातौं चरणको खेल अन्तर्गत हुने पोखरा डर्बी रोमान्चक हुने अनुमान गरिएको छ । किनकि दुबई टिम डर्बी भिडन्त बाजी मार्न चाहन्छन् ।
यस्तै दुबै टोलीलाई समर्थकको आगमनले थप उत्साहित बनाउने छन् । पोखराका दुबै टोलीका समर्थकहरुको बाक्लो उपस्थिति हुनेछ ।
राष्ट्रिय फुटसल टिमका मुख्य प्रशिक्षक रहिसकेका बिष्णु गुरुङको प्रशिक्षणमा स्पोर्ट्स क्यासलले जारी लिगमा हार ब्यहोरेको छैन । ६ खेलमा १६ अंक जोडेर स्पोर्ट्स क्यासल शीर्ष स्थानमा रहेको छ ।
राष्ट्रिय फुटबल टोलीका पूर्व खेलाडी विजय गुरुङ जस्ता खेलाडीको साथ स्पोर्ट्स क्यासललाई रहेको छ ।
चर्चित प्रशिक्षक तथा पूर्व खेलाडी राजेन्द्र तामाङको प्रशिक्षणमा सबिन मेमोरियल रहेको छ । सबिन मेमोरियलले ६ खेलमा १० अंक जोडेको छ । सबिन मेमोरियल पाँचौं स्थानमा रहेको छ ।
सबिन मेमोरियल डर्बी भिडन्त जित्दै शीर्ष चारको हो कायम राख्न चाहन्छ । जारी लिगमा १२ गोल गरिसकेका अविनास तामाङ जस्ता खेलाडीको साथ सबिन मेमोरियललाई रहेको छ ।
