नेपालले पहिलो पटक कुस्तीको विश्व च्याम्पियनसिप खेल्दै

काठमाडौं । कुस्तीको विश्व च्याम्पियनसिपमा नेपालका तीन खेलाडीले प्रतिस्पर्धा गर्ने भएको छ ।

नर्वेमा आयोजना हुने विश्व च्याम्पियनसिपमा नेपालका तीन पुरुष खेलाडीले प्रतिस्पर्धा गर्ने भएका हुन् ।

च्याम्पियनसिप अक्टोबर २ देखि १० सम्म आयोजना हुनेछ ।

नेपालले पहिलो पटक कुस्तीको विश्व च्याम्पियनसिपमा सहभागिता जनाउन लागेको हो ।

विश्व च्याम्पियनसिपमा नेपालका सुमिर कुमार साह, सुरेश चुनारा र साहिल अन्सारीले प्रतिस्पर्धा गर्ने छन् ।

सुमिरले ९७ केजी तौल र सुरेशले ७४ केजीमा प्रतिस्पर्धा गर्ने छन् भने साहिलको तौल समूह तय भएको छैन ।

नेपालमा आयोजना भएको १३ औं सागमा सुमिर र सुरेशले कास्य पदक जितेका थिए ।

नेपाली टोलीको मुख्य प्रशिक्षमा धर्म राज यादव रहेका छन् ।

च्याम्पियनसिपका लागि नेपाली टोलीले गत भदौबाट राजधानीमा विशेष तयारी गरेको संघका अध्यक्ष राज मोहमद अन्सारीले जानकारी गराए ।

उनले नेपाली टोलीले पदक जितेर स्वदेश फर्कने विश्वास समेत व्यक्त गरे ।

कुस्ती टोलीलाई बुधबार नेपाल कुस्ती संघले बिदाइ गरेको छ ।

नेपाल ओलम्पिक कमिटिका अध्यक्ष जीवन राम श्रेष्ठ, संघका अध्यक्ष राज मोहमद अन्सारी, संघका उपाध्यक्ष तथा मुस्लिम आयोगका अध्यक्ष समिम मिँया अन्सारी लगायतले बिदाइ गरे ।