पोखरा । राष्ट्रिय 'ए' डिभिजन फुटसल लिगमा स्पोर्ट्स क्यासलले फराकिलो जित निकालेको छ ।
पोखराको बहूदेशीय कभर्डहलमा शनिबार स्पोर्ट्स क्यासलले लुम्बिनी फुटसललाई १२-१ गोल अन्तरले पराजित गरेको हो ।
स्पोर्ट्स क्यासलको जितमा सुमित श्रेष्ठ र विजय गुरुङले ह्याट्रिक गरे ।
यस्तै किशोर गुरुङले दुई तथा क्षितिज गुरुङ, सुरेन बुढा मगर र भिसन गुरुङले एक गोल गरे । लुम्बिनीका सुजन थापाले आत्मघाती गोल गरे ।
लुम्बिनीका रुपेन बराइलीले एक गोल फर्काए ।
स्पोर्ट्सका सुमित म्यान अफ दि म्याच चुनिए ।
यस जितसँगै स्पोर्ट्स क्यासल शीर्ष स्थानमा उक्लिएको छ ।
स्पोर्ट्सले ४ खेलमा १० अंक जोडेको छ ।
लुम्बिनीले ४ खेलमा ४ अंक जोडेको छ ।
यस्तै अर्को खेलमा मछिन्द्र स्काई गोल्सले फुटसल फाइभ धरानलाई ७-३ गोल अन्तरले पराजित गर्यो ।
मछिन्द्रको जितमा निर्मल गुरुङ र मिसन लामाले दुई दुई गोल गरे । श्री कृष्ण श्रेष्ठ, अमित तामाङ र रोशन अधिकारीले एक एक गोल गरे ।
फुटसल फाइभका सन्दीप कार्कीले दुई गोल गरे । रञ्जित गुरुङले एक गोल थपे ।
मछिन्द्र स्काईले ४ खेलमा ६ अंक जोडेको छ । फुटसलले ५ खेलमा ५ अंक जोडेको छ ।
लिगमा १० टिमले प्रतिस्पर्धा गरिरहेका छन् ।
फुटसल लिगको विजेताले १० लाख प्राप्त गर्दा उपविजेताले ५ लाख पाउने एन्फाले जनाएको छ ।
यस्तै उत्कृष्ट गोलकिपर, उत्कृष्ट विंगर, उत्कृष्ट डिफेन्डर, उत्कृष्ट प्रशिक्षक र इमर्जिङ खेलाडीले समान २५ हजार पाउने एन्फाले जनाएको छ ।
