नेकोसले राष्ट्रिय खेल नीतिको प्रस्ताव तयार गर्ने

काठमाडौं । राष्ट्रिय खेलकुद महासंघ (नेकोस)ले राष्ट्रिय खेल नीतिको प्रस्ताव तयार गर्ने निर्णय गरेको छ ।

मंगलबार काठमाडौंमा सम्पन्न नेकोसको केन्द्रिय पदाधिकारी बैठकले राष्ट्रिय खेल नीतिको लागि प्रस्ताव तयार गर्ने निर्णय गरेको हो ।

नेपालमा राष्ट्रिय खेल नीति अहिलेसम्म बन्न सकेको छैन । युवा तथा खेलकुद मन्त्रालयमा प्रस्तावित राष्ट्रिय खेल नीति थन्किएर बसेको छ ।

पछिल्लो समय तत्कालिन खेलकुद मन्त्री दलजित श्रीपाइलीको पालामा खेल नीतिबारे छलफल समेत भएको थियो । तर त्यो भन्दा प्रक्रिया अघि बढ्न सकेन ।

पछिल्लो समय जगत विश्वकर्माले राष्ट्रिय खेलकुद विकास ऐन बनाएर कार्यान्वयनमा ल्याए । तर खेलकुद ऐनको सफल कार्यान्वयन हुन सकेको छैन । राष्ट्रिय खेल नीति नहुँदा घरेलु र अन्तराष्ट्रिय खेलकुदमा नेपालको लक्ष्य र तयारीको प्रष्ट खाका छैन ।

नेकोसको पदाधिकारी बैठकले थाती रहेको नेपालको राष्ट्रिय खेल नीतिको लागि प्रस्ताव तयार गर्नेदेखि स्थापना दिवसका अवसरमा मेचि–महाकाली राष्ट्रिय खेल जागरण अभियान सञ्चालन गर्ने र अन्तराष्ट्रिय आबद्धता र सहकार्य गर्ने निर्णय गरेको छ ।