काठमाडौं । राष्ट्रिय तथा अन्तराष्ट्रिय खेलाडीहरुले आफुहरुका लागि खेलकुद पूर्वाधारको अभाव भएको बताएका छन् ।
युवा तथा खेलकुद मन्त्रालयमा बिहीबार आयोजित कार्यक्रममा खेलाडीहरुले पूर्वाधारको अभावका कारण आफुहरुले नियमित प्रशिक्षण गर्न नपाएको गुनासो गरे ।
राष्ट्रिय महिला बास्केटबल टिमकी कप्तान सदिना श्रेष्ठले खेलकुद पूर्वाधार नहुँदा आफुहरुले अभ्यास गर्न नपाएको गुनासो गरिन् ।
‘१३ औं सागमा महिला बास्केटबल टिमले ऐतिहासिक रजत पदक जित्यो । तर आफ्नै देशमा भएको प्रतियोगितामा एक दिनपनि आफ्नै कोर्टमा अभ्यास गर्न पाएनौं ।’ उनले भनिन्, ‘पूर्वाधारनै नभएपछि खेलाडी कसरी उभोँ लाग्ने ?’
उनले काठमाडौंको त्रिपुरेश्वरमा भएको एउटा कभर्डहलले सबै खेललाई सम्भव नहुने समेत धारणा राखिन् । एउटै कभर्ड हल सबै खेलका लागि प्रयोग गर्न सम्भव नहुने उनको भनाई थियो ।
‘एउटा कभर्डले सबै खेलले हुदैन । यो उचित पनि हुदैन ।’ उनले भनिन् ।
युवा तथा खेलकुद मन्त्रालयले राष्ट्रिय खेलकुद विकास ऐनको नियमावलीका सन्दर्भमा अन्तरक्रिया गर्न बिहीबार राष्ट्रिय तथा अन्तराष्ट्रिय खेलाडीलाई बोलाएको थियो । तर खेलाडीको चिन्ता खेलकुद पूर्वाधारमा देखियो ।
उनीहरुले खेलाडीको मुख्य समस्या खेलकुद पुर्वाधारनै रहेको उल्लेख गर्दै आफुहरुले नियमित अभ्यास समेत गर्न नपाएको गुनासो गरेका थिए । खेलाडीले नियमित रुपमा अभ्यास गर्न वातावरण पाउनुपर्ने खेलाडीको माग थियो ।
सागकी अर्की स्वर्णधारी खेलाडी सन्तोषी श्रेष्ठले भएको पूर्वाधारको समेत आफुहरुले प्रयोग गर्न नपाएको भन्दै गुनासो गरिन् ।
‘रंगशालाको ट्रयाक एथलेटिक्स खेलाडीले उपयोग गर्न पाइरहेका छैनन् । पूर्वाधार नहुनु एउटा कुरा हो तर भएको कुरा प्रयोग गर्न पाएको छैन ।’ उनले भनिन् ।
राष्ट्रिय खेलकुद परिषद् (राखेप)ले दशरथ रंगशालाको ट्रयाकमा खेलाडीलाई निषेध गरेको छ । यसअघि दैनिक रुपमा प्रशिक्षण गर्दै आएका खेलाडीलाई संघको अनुमती, परिचय पत्र लगायत कागजात आवश्यक पर्ने भन्दै खेलाडीलाई रंगशाला प्रवेशमा रोक लगाइएको छ ।
श्रेष्ठले खेलाडीलाई पूर्वाधारकै अभाव भएपनि उपलब्ध स्रोत साधान समेत राम्रोसंग सदुपयोग गर्न नपाएको गुनसो गरिन् ।
‘अभाव पूर्वाधारकै हो । एउटा मात्र रंगशाला छ । त्यही रंगशाला पनि प्रयोग गर्न पाएका छैनौं ।’ उनले भनिन् ।
राष्ट्रिय खेलकुद ऐन कार्यान्वयनका लागि मन्त्रालयले गठन गरेको समितिले नियमावली निर्माणको कामलाई अन्तिम चरणमा पुर्याएको छ । नियमावली निर्माणको काम सकेर समितिले अहिले विभिन्न सरोकारवाला निकायसंग अन्तिम सुझाव लिने काम गरिरहेको छ ।
