काठमाडौं । नेपाल पर्वतीय खेलकुद महासंघले सरकारले नयाँ आर्थिक वर्षका लागि खेलकुदमा छुट्टाएको बजेटको स्वागत गरेको छ ।
महासंघले सोमबार प्रेस विज्ञप्ति निकाल्दै नेपाललाई खेल पर्यटनको गन्तव्य बनाउने योजनासहित घोषणा भएको बजेटको स्वागत गरेको हो ।
सरकारले नयाँ आर्थिक वर्षका लागि युवा तथा खेलकुद मन्त्रालयलाई २ अर्ब ७४ करोड रुपैयाँ बजेट विनियोजन गरेको छ ।
अर्थमन्त्रीले विष्णु प्रसाद पौडेलले शनिबार आर्थिक वर्ष २०७८/७९ को बजेट सार्वजनिक गर्दै युवा तथा खेलकुद मन्त्तालयका लागि २ अर्ब ७४ करोड रुपैयाँ बजेट विनियोजन गरेको जानकारी दिएका थिए ।
'पहिलो पटक नेपाल र नेपालीको भावना समेटने बजेट आएको हामीले अनुभूति गरेका छौं , खासगरी खेलकुद क्षेत्रमा । बजेटको आकार भन्दा त्यसले सम्बोधन गरेको र स्वीकार गरेको वास्तविकताले हामीलाई पनि उत्साहित बनाएको हो,' अध्यक्ष गोविन्द भट्टराईले जारी गरेको विज्ञप्तिमा भनिएको छ, 'फेडेरेसनको एक दशकको लबिङ तथा नेपाल खेलकुद महसंघको नीतिगत समर्थनले नेपाललाई खेल पर्यटनको विश्वव्यापी केन्द्र बनाउने घोषणा नै नेपाली खेलकुदको आगामी र अग्रगामी भविष्य हो । त्यस्तै, विश्वस्तरको खेल विद्यालयले कम्तिमा आम विषय अब सिंहदरबारको पनि विषय बन्न पुगेको अनुभूति भएको छ ।'
यस्तै महासंघले पूर्व खेलाडीलाई सहुलियतमा व्यवसायिक कर्जा र नबौं राष्ट्रिय खेलकुदको ग्यारेन्टी तथा देशव्यापी पूर्वाधार निर्माणको घोषणा बजेटको आशा लाग्दो विषय भएको जनाएको छ ।
महासंघले हाई अल्टीच्युट स्पोर्ट्स ट्रेनिंग सेन्टर निर्माण र काठमाडौं र फेवा ताल वरिपरिको साइकल लेन निर्माणमा सरकारको प्रतिबद्धता साच्चै गर्व गर्न लायक रहेको तर यसको सफल
कार्यन्वयन हुनुपर्नेमा जोड दिएको छ ।
शाहसिक पर्यटनको लागि राष्ट्रिय अन्तराष्ट्रिय आकर्षण गर्ने सरकारी नितिको सफल कार्यन्वयन भएमा अल्पाइन र माउन्टेन क्षेत्रमा शाहसिक खेल मार्फत पर्यटन प्रवर्धन गर्ने महासंघको अभियान सफल भएको मानिने जनाएको छ ।
महासंघले यस पटकको बजेटले पहिलो पटक वाटर स्पोर्ट्सलाई प्रस्ट सम्बोधन गरिएको तर कार्यन्वयनमा शंका रहेको जनाएको छ ।
बजेटले दिगो पर्यटन, दिगो विकास र समृद्ध नेपालको लागि खेलकुद क्षेत्रलाई प्रस्ट किटान गरेको बताउँदै महासंघले बञ्जी, माउन्टेनियरिंग, रक क्लाइम्बिङ, र्याफ्टिङ, प्याराग्लाइडिङ लगायतका शाहसिक खेल मार्फत दिगो पर्यटनको योजना बन्नु खुसीको कुरा भएको जनाएको छ ।
