न्यु डायमण्ड सेमिफाइनलमा

तातोपानी । न्यु डायमण्ड स्पोर्ट्स क्लब भोटेकोशी गाउँपालिका अध्यक्ष कप राष्ट्रिय महिला भलिबल प्रतियोगिताको सेमिफाइनलमा प्रवेश गरेको छ ।

सिन्धुपाल्चोकको भोटेकोशीमा बिहीबार ढोरपाटन स्पोर्ट्स क्लबलाई ३-० को सोझो सेटमा पराजित गर्दै न्यु डायमण्ड समूह विजेता बन्दै अन्तिम चारमा पुगेको हो ।

दोस्रो रोजाईका खेलाडी मैदान उतारेको न्यु डायमण्डले ढोरपाटनमाथि २५-१२,२५-१२ र २२-१२ को सेटमा जित निकाल्यो ।

न्यु डायमण्डको जितमा पनामिका राई प्लेयर अफ दि म्याच चुनिईन् । उनले ट्रफी र नगद २ हजार प्राप्त गरिन् ।

जितसँगै न्यु डायमण्ड समूह 'ए' को विजेता बन्यो । न्यु डायमण्डले २ खेलमा ६ अंक जोड्यो ।

पहिलो खेलमा न्यु डायमण्डले त्रिभुवन आर्मीलाई हराएको थियो ।

यस समूहबाट आर्मी उपविजेता बन्दै सेमिफाइनलमा पुगेको छ । आर्मीले २ खेलमा ३ अंक जोड्यो ।

बिहीबार नै भएको खेलमा आर्मीले ढोरपाटनमाथि २५-१०,२५-८ र २५-१२ को सेटमा जित निकालेको थियो ।

ढोरपाटन अंक विहीन बन्दै बाहिरिएको छ ।

अब न्यु डायमण्डले सेमिफाइनलमा नेपाल पुलिस क्लबसँग खेल्नेछ । यस्तै एपीएफले त्रिभुवन आर्मी क्लबसँग खेल्नेछ ।

एपीएफ समूह 'बी' को विजेता र पुलिस समूह 'बी' को उपविजेता बन्दै सेमिफाइनलमा पुगेको हो ।

एपीएफले बिहीबार नेपाल पुलिस क्लबलाई ३-१ को सेटमा पराजित गरेको थियो ।

एपीएफले पुलिसमाथि २२-२५, २५-२१,२५-२१ र २५-१५ को सेटमा जित निकाल्यो । एपीएफको जितमा सरस्वती चौधरी प्लेयर अफ दि म्याच बनिन् ।

यस समूहमा २ टिम मात्र भएको कारण दुबै टिम सेमिफाइनलमा पुगेको हो ।

भोटेकोशी गाउँपालिकाको आयोजना भएको प्रतियोगितामा तीन विभागीयसहित ५ टिमको सहभागिता रहेको छ ।

प्रतियोगिताको विजेताले ३ लाख तथा उपविजेताले २ लाख पुरस्कार रकम प्राप्त गर्नेछ । त्यस्तै तृतीय हुने टोलीले १ लाख र चौथो हुनेले ५० हजार प्राप्त गर्नेछ ।

प्रतियोगिताको सर्वाेत्कृष्ट खेलाडीले २० हजार प्राप्त गर्नेछ । यस्तै उत्कृष्ट स्पाइकर, उत्कृष्ट सर्भर, उत्कृष्ट लिवेरो, उत्कृष्ट ब्लकर, उत्कृष्ट सेटर र उत्कृष्ट प्रशिक्षकले समान ७–७ हजार प्राप्त गर्ने छन् ।