एपीएफ र पुलिस सेमिफाइनलमा

तातोपानी । विभागीय टिम एपीएफ क्लब भोटेकोशी गाउँपालिका अध्यक्ष कप राष्ट्रिय महिला भलिबल प्रतियोगिताको सेमिफाइनलमा प्रवेश गरेको छ ।

सिन्धुपाल्चोकको भोटेकोशीमा बिहीबार भएको खेलमा नेपाल पुलिस क्लबलाई ३-१ को सेटमा पराजित गर्दै एपीएफ अन्तिम चारमा पुगेको हो ।

एपीएफले पुलिसमाथि २२-२५, २५-२१,२५-२१ र २५-१५ को सेटमा जित निकाल्यो । एपीएफको जितमा सरस्वती चौधरी प्लेयर अफ दि म्याच बनिन् ।

यस जितसँगै समूह 'बी' को एपीएफ समूह विजेता बन्दै सेमिफाइनलमा पुगेको हो ।

पराजित पुलिस पनि समूह उपविजेता बन्दै सेमिफाइनलमा प्रवेश गरेको छ ।

यस समूहमा २ टिम मात्र भएको कारण दुबै टिम सेमिफाइनलमा पुगेको हो ।

प्रतियोगिता अन्तर्गत नै अर्को खेलमा त्रिभुवन आर्मी क्लबले ढोरपाटन स्पोर्ट्स क्लबलाई ३-० को सोझो सेटमा पराजित गर्यो ।

आर्मीले ढोरपाटनमाथि २५-१०,२५-८ र २५-१२ को सेटमा जित निकाल्यो ।

खेलको प्लेयर अफ दि म्याच सुनिता खड्का चुनिईन् ।

भोटेकोशी गाउँपालिकाको आयोजना भएको प्रतियोगितामा तीन विभागीयसहित ५ टिमको सहभागिता रहेको छ ।

प्रतियोगिताको विजेताले ३ लाख तथा उपविजेताले २ लाख पुरस्कार रकम प्राप्त गर्नेछ । त्यस्तै तृतीय हुने टोलीले १ लाख र चौथो हुनेले ५० हजार प्राप्त गर्नेछ ।

प्रतियोगिताको सर्वाेत्कृष्ट खेलाडीले २० हजार प्राप्त गर्नेछ । यस्तै उत्कृष्ट स्पाइकर, उत्कृष्ट सर्भर, उत्कृष्ट लिवेरो, उत्कृष्ट ब्लकर, उत्कृष्ट सेटर र उत्कृष्ट प्रशिक्षकले समान ७–७ हजार प्राप्त गर्ने छन् ।