काठमाडौं । न्यु डाईमण्डले भोटेकोशी गाउँपालिका अध्यक्ष कप राष्ट्रिय महिला भलिबल प्रतियोगितामा विजय सुरुवात गरेको छ ।
सिन्धुपाल्चोकको भोटेकोशीमा बुधबार भएको उद्घाटन खेलमा विभागीय टोली त्रिभुवन आर्मी क्लबलाई ३–० को सोझो सेटमा पराजित गर्दै न्यु डाईमण्डले सुखद सुरुवात गरेको हो ।
विजयी सुरुवात गर्ने क्रममा डाईमण्डले आर्मीलाई २५–१४, २५–९ र २५–१४ को सेटमा हराएको हो । खेलको प्लेयर अफ दि म्याच न्यु डाईमण्डकी झरना श्रेष्ठ चुनिईन् । उनले ट्रफी र नगद २ हजार प्राप्त गरिन् ।
अब बिहीबार हुने पहिलो खेलमा आर्मीले ढोरपाटन ट्रेनिङ सेन्टरसँग खेल्नेछ । नेपाल पुलिसले एपीएफ क्लबसँग र न्यु डाईमण्डले ढोरपाटनसँग खेल्दै लिगको अन्तिम खेल सकिनेछ ।
भोटेकोशी गाउँपालिकाको आयोजना भएको प्रतियोगितामा तीन विभागीयसहित ५ टिमको सहभागिता रहेको छ ।
प्रतियोगिताको विजेताले ३ लाख तथा उपविजेताले २ लाख पुरस्कार रकम प्राप्त गर्नेछ । त्यस्तै तृतीय हुने टोलीले १ लाख र चौथो हुनेले ५० हजार प्राप्त गर्नेछ ।
प्रतियोगिताको सर्वाेत्कृष्ट खेलाडीले २० हजार प्राप्त गर्नेछ । यस्तै उत्कृष्ट स्पाइकर, उत्कृष्ट सर्भर, उत्कृष्ट लिवेरो, उत्कृष्ट ब्लकर, उत्कृष्ट सेटर र उत्कृष्ट प्रशिक्षकले समान ७–७ हजार प्राप्त गर्ने छन् ।
-1732534788.jpg)
