काठमाडौं । पाँचौं आरबीबी एनभीए राष्ट्रिय महिला तथा पुरुष क्लब लिग भलिबल प्रतियोगिता बिहीबार सम्पन्न भयो ।
त्रिपुरेश्वरस्थित राखेपको कर्भडहलमा सम्पन्न प्रतियोगितामा महिलातर्फ न्यु डाईमण्ड र पुरुषतर्फ हेल्प नेपालले उपाधि जिते । क्लब च्याम्पियनसिप नेपाल भलिबल संघले आयोजना गर्ने सबैभन्दा ठुलो प्रतियोगिता हो ।
यस पटकको भलिबल क्लब च्याम्पियनसिप केही कारणले विशेष रह्यो । प्रतियोगितामा देखिएका ५ वटा महत्वपूर्ण पक्षलाई हामीले समावेश गरेका छौं ।
विदेशी खेलाडीकाे प्रभाव
प्रतियोगितामा प्रत्येक टिमले तीन विदेशी खेलाडी राख्न पाईने प्रावधान छ । अघिल्लो वर्ष हेल्प नेपालले मात्र विदेशी खेलाडीलाई ल्याउने गर्दथ्यो । तर यसपटक भने रारा बुलबुलेले पनि तीन विदेशी खेलाडी ल्याएको थियो । जसका कारण प्रतियोगिता थप रोमान्चक बन्यो । हेल्प नेपालले तीन भारतीय खेलाडी तथा रारा बुलबुलेले तीन पाकिस्तानी खेलाडीलाई टिममा समावेश गरेका थिए ।
हेल्प नेपालमा सम्मिलित तीन खेलाडीमा बिनित कुमार भारतीय टिमका कप्तान समेत हुन् । रोहित कुमार एसियन गेम्स खेलेका र विकास राष्ट्रिय टिमका पूर्व सदस्य हुन् । निकै उत्कृष्ट प्रर्दशन गरेका विदेशी खेलाडीबाट नेपाली खेलाडीले पनि सिक्ने अवसर पाए ।
विदेशी खेलाडीकै प्रभावमा हेल्प नेपालले प्रतियोगिताको उपाधि समेत उचाल्यो ।
प्रतिभाको उत्कृष्ट पुनरागमन
यस वर्षको प्रतियोगिता प्रतिभा मालीको उत्कृष्ट पुनरागमनले समेत खास बन्यो । प्रतिभाले गतवर्ष यसै प्रतियोगिताको फाइनल खेलमा गम्भिर चोट बोकेकी थिईन् ।
फाइनलमा एपीएफविरुद्ध स्पाइक हानेर ‘ल्यान्डिङ’ हुने क्रममा सन्तुलन नमिल्दा घाइते भएकी थिईन् ।
चोटका कारण प्रतिभा करिब एकवर्ष मैदान बाहिर रहिन् । तर उत्कृष्ट पुनरागमन गर्दै प्रतिभाले प्रतियोगिताको उपाधि चुम्न सफल भईन् । उनकै उच्च प्रर्दशनमा न्यु डाईमण्डले लामो समयको अन्तरालपछि उपाधि जितेको थियो ।
महिला टिममा सबैभन्दा बलियो टिम मानिने एपीएफलाई ३–१ को सेटमा हराउँदै फाइनलमा आफ्नो स्थान बनाएको थियो । प्रतिभा प्रतियोगिताको सर्वाेत्कृष्ट खेलाडी बन्दै पुरानै लयमा फर्किएको प्रमाणित गरिन् ।
अफिसियल ब्रोडकाष्ट
नेपाल भलिबल संघले आधिकारिक प्रशारण अधिकार बेचेर यस वर्ष कमाई समेत गर्यो । प्रत्यक्ष प्रशारणका लागि समस्या भोग्दै आएको संघलाई मिडिया हबले ३ लाख रुपैयाँ दिएर प्रशारण अधिकार किन्यो ।
करोडौं रुपैयाँ प्रत्यक्ष प्रशारण बापत कमाईरहेका फुटबल र क्रिकेट संघले कमाईरहेका छन् । अब यसमा भलिबलसमेत जोडिएको छ । सुरुवातमा ३ लाख मात्र पाएको छ । अब यो क्रम बढ्ने देखिन्छ ।
एपीएफले गुमाएको लय
एपीएफ महिला भलिबलको पावर हाउस हो । तर पछिल्लो समय एपीएफले लय गुमाएको छ । प्राय सबै प्रतियोगिताको च्याम्पियन बन्ने गरेको एपीएफको यसवर्षको प्रर्दशन निकै फितलो देखिएको छ । सबै टिमलाई सजिलै पराजित गर्ने क्षमता राख्ने एपीएफ यसपटक भने कमजोर देखियो ।
महिला भलिबलमा एकछत्र राज गरेको एपीएफलाई न्यु डाईमण्ड तथा नेपाल पुलिसले सजिलै हराउने अवस्था बनेको छ । एपीएफलाई नेपाल पुलिस तथा न्यु डाईमण्डले समान ३–१ को सेटमा हराए । एपीएफकी मुख्य खेलाडी सरस्वतीको प्रर्दशन समेत कमजोर देखियो ।
यसअघि टिमले उपाधि हात पार्दा होस वा पराजित हुँदा उनले विधागततर्फ उपाधि हात पार्दै आएकी थिईन् । तर यसपटक भने उनी उपाधि विहिनसंगै ब्यक्तिगत स्पर्धामा समेत कमजोर देखिईन् ।
युवा खेलाडीको उच्च प्रर्दशन
यस प्रतियोगितामा स्टार खेलाडी ओझेल परे । तर नयाँ खेलाडीले आफुलाई यस प्रतियोगितामा उत्कृष्ट साबित गरे । तीमध्ये महिलातर्फ न्यु डाईमण्डकी बाल्मिका आचार्य, झरना श्रेष्ठ, आर्मीकी सृष्टि खड्गी, पुलिसकी लक्ष्मी चन्द, भरतपुरकी आरती सुबेदी, निशा चौधरीको प्रर्दशन उच्च रह्यो ।
बाल्मिका, र झरना न्यु डाईमण्डका मुख्य खेलाडी हुन् । उनीहरुकै उच्च प्रर्दशनमा टिमले लामो समयपछि उपाधि हात पा¥यो । आर्मीकी सृष्टि आशालाग्दो खेलाडीमा देखा परिन् ।
पछिल्लो समय उनी सेट बाहिर हुन्थिन् । तर यसपटक अवसर पाईन् । जसको उचित सदुपयोग गर्दै सृष्टिले आफुलाई प्रमाणित गरिन् । पुरुषतर्फ नयाँबजारका सन्तोष थापा, विवश थापा र रुप बहादुर गुरुङजस्ता युवा खेलाडीको प्रर्दशन उत्कृष्ट रह्यो ।
टिमले प्रतियोगितामा खासै राम्रो नतिजा हात पारेन तर युवा खेलाडीको प्रर्दशन उच्च थियो । उनीहरुले उमेर समूहमा आफुलाई उत्कृष्ट साबित गरेका छन् । साथै राष्ट्रिय टिममा स्थान बनाउन सक्ने क्षमता प्रस्तुत गरेका छन् ।
-1732534788.jpg)
