पुलिससँग एपीएफ स्तब्ध

काठमाडौं । नेपाल पुलिस क्लबले पाँचौ संस्करणको आरबीबी एनभीए राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फ एपीएफ क्लबलाई पराजित गरेको छ ।

त्रिपुरेश्वरस्थित राखेपको कर्भडहलमा शनिबार भएको डर्बी भिडन्तमा पुलिसले एपीएफलाई ३-२ को सेटमा पराजित गरेको हो ।

निकै प्रतिस्पर्धात्मक बनेको खेलमा सुरुवाती दुई सेट एपीएफले २५-२० र ३०-२८ ले जितेको थियो ।

तर, त्यसपछिका सेटमा भने पुलिसले उत्कृष्ट पुनरागमन गर्यो । पुलिसले तेस्रो सेट २५-२३, चौंथो सेट २५-१९ र पाँचौ सेट १५-११ ले जित्दै खेल आफ्नो पक्षमा पारेको हो ।

यससँगै पुलिसले लिगमा लगातार दोस्रो जित निकालेको छ । पुलिसले २ खेलमा ५ अंक जोडेको छ ।

पुलिस लिगको तेस्रो स्थानमा रहेको छ । एपीएफको यो पहिलो हार हो । एपीएफले २ खेलमा ४ अंक जोडेको छ ।

जितपछि पुलिसका मुख्य प्रशिक्षक रुपेश विष्टले एपीएफलाई हराउँन सफल भएकोमा टिमबाट खुसी भएको बताए ।

'हामी जित्छौं भनेर नै खेलेका हौँ । जित्यौं पनि । खुसी लागेको हो । पहिलो र दोस्रो सेटमा ब्लक र अट्याक मिलेन । अरु सेटमा सबै मिल्यो,' उनले भने ।

शनिबार नै भएको यस अघिको खेलमा न्यु डाइमण्डले भरतपुर मेट्रो खेलकुद परिषदलाई ३-० को सेटमा हराएको थियो ।

त्यस्तै विभागीय टिम आर्मीले ढोरपाटनलाई ३-० को सेटमा हराएको थियो ।

प्रतियोगितामा पुरुषतर्फ ७ टिम र महिलातर्फ ६ टिमले प्रतिस्पर्धा गरिरहेका छन् । लिगको शीर्ष दुई टिमले उपाधिका लागि खेल्ने छन् ।

लिगको महिला र पुरुष विजेताले ३ लाख नगद प्राप्त गर्ने छन् । यस्तै उपविजेताले १ लाख ५० हजार प्राप्त गर्दा तेस्रोले ७६ हजार र चौंथोले ३७ हजार ५ सय पाउने संघले जनाएको छ ।

प्रतियोगिताको सर्वाेत्कृष्ट महिला र पुरुष खेलाडीले जनही २५ हजार पाउनेछन् । उत्कृष्ट लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार पाउनेछन् ।