काठमाडौं । विभागीय टिम त्रिभुवन आर्मी क्लबले पाँचौ संस्करणको आरबीबी एनभीए राष्ट्रिय महिला तथा पुरुष क्लब लिग भलिबल च्याम्पियनसिपमा विजयी सुरुवात गरेको छ ।
त्रिपुरेश्वरस्थित राखेपको कर्भडहलमा शुक्रबार न्यु डाइमण्ड स्पोर्ट्स क्लबलाई ३-२ को सेटमा हराउँदै आर्मीले विजयी सुरुवात गरेको हो ।
निकै प्रतिस्पर्धात्मक बनेको खेलमा आर्मीले न्यु डाइमण्डमाथि २५-१७, २०-२५, २५-२३, १५-२५ र १५-१२ को सेटमा जित निकालेको हो ।
आर्मीसँग पराजित भएपछि न्यु डाइमण्डका प्रशिक्षक कुमार राईले खेलाडीले सोचेको जस्तो प्रदर्शन नगर्दा पराजित भएको बताए ।
'आजको खेलमा म खुसी छैन । सोचेको खेलाडीले सोचेको जस्तो प्रदर्शन गर्न सकेनन् । सर्भिस र ब्लक बिग्रिएको छ । स्पाइक पनि बिग्रिएको छ,' उनले भने, 'खेलाडी हतोत्साहित भए । तर, हाम्रो फाइनल पुग्ने बाटो अझै छ ।'
जितसँगै आर्मीले पहिलो खेलमा महत्वपूर्ण २ अंक जोडेको छ । न्यु डाइमण्डको यो पहिलो हार हो ।
पहिलो खेलमा न्यु डाइमण्डले ढोरपाटन स्पोर्ट्स क्लबलाई हराएको थियो ।
महिलातर्फ नै शुक्रबार एपीएफ क्लब र नेपाल पुलिस क्लबले जित निकालेका छन् ।
पुलिसले मेट्रो खेलकुद परिषदमाथि २५-४, २५-८ र २५-१२ को सेटमा जित निकाल्यो ।
एपीएफले ढोरपाटनमाथि २५-३, २५-९ र २५-५ को सेटमा हरायो ।
प्रतियोगितामा पुरुषतर्फ ७ टिम र महिलातर्फ ६ टिमले प्रतिस्पर्धा गरिरहेका छन् । लिगमा महिलातर्फ एपीएफ, आर्मी, पुलिस, न्यु डाइमण्ड, ढोरपाटन र भरतपुर मेट्रो खेलकुद परिषद् रहेका छन् ।
यस्तै, पुरुषतर्फ एपीएफ, आर्मी, पुलिस, बुलबुले रारा, हेल्प नेपाल, नयाँ बजार सामाजिक युवा क्लब, मणिमुकुन्द छन् ।
लिगको महिला र पुरुष विजेताले ३ लाख नगद प्राप्त गर्ने छन् । यस्तै उपविजेताले १ लाख ५० हजार प्राप्त गर्दा तेस्रोले ७६ हजार र चौंथोले ३७ हजार ५ सय पाउने संघले जनाएको छ ।
प्रतियोगिताको सर्वाेत्कृष्ट महिला र पुरुष खेलाडीले जनही २५ हजार पाउनेछन् । उत्कृष्ट लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार पाउनेछन् ।
