खेलाडी परिवारको सहयोगार्थ फुटसल

काठमाडौं । स्वयम्भू क्लबका पूर्व फुटबल खेलाडी स्व. विपिन शर्माको परिवारलाई आर्थिक सहयोग गर्ने उद्देश्यले एक दिने फुटसल प्रतियोगिता हुने भएको छ ।

साहस स्पोर्ट्सको आयोजनामा विपिन शर्मा स्मृति कप खुला फुटसल शनिबार हुन लागेको हो । प्रतियोगितामा करिब ३२ पुरुष टिमको सहभागिता रहने प्रतियोगिता संयोजक महेश मल्ल ठकुरीले बुधबार आयोजित पत्रकार सम्मेलनमा जानकारी गराए ।

विजेताले ७५ हजार ५ सय ५५ र उपविजेताले ३५ हजार ५ सय ५५ रुपैयाँ नगद पुरस्कार प्राप्त गर्ने छन् । उत्कृष्ट खेलाडी र गोलरक्षकलाई जनही २ हजार ५ सय नगद पुरस्कार प्रदान गरिने छ । प्रतियोगिता सञ्चालन गर्न करिब ३ लाख रुपैयाँ खर्च हुने सह–संयोजक सन्तोष न्यौपानेले जानकारी दिए ।

प्रतियोगिताका खेलहरु स्वयम्भूस्थित द एक्सेल्सियर स्कुलमा हुने छ । मेडिकल पार्टनरका रुपमा शुभेक्छा अस्पताल, सीतापाइला रहेको छ ।