नविनलाई हराउँदै प्रिन्स च्याम्पियन

सिन्धुपाल्चोक । आर्मीका नविन श्रेष्ठलाई हराउँदै प्रिन्स दाहालले तेस्रो चौतारा साँगाचोकगढी मेयर कप तथा प्रथम तोप–२१ ब्याडमिन्टन प्रतियोगिताको उपाधि जितेका छन् ।

शुक्रबार जिल्ला सदरमुकामको कभर्डहलमा भएको उपाधि भिडन्तमा प्रिन्सले नविनलाई २१-१४, २१-१० काे सोझो सेटमा पराजित गरे ।

नेपाल नम्बर एक रत्नजित तामाङलाई पराजित गर्दै प्रिन्सले फाईनल यात्रा तय गरेका थिए । व्यक्तिगत स्पर्धामा प्रिन्सले रत्नजितमाथि पहिलो पटक हराएका हुन् ।

जितसंगै प्रिन्सले नगद १ लाख ११ हजार रुपैयाँ प्राप्त गरेका छन् । उपविजेता नविनले ५५ हजार ५ सयमा चित्त बुझाएका छन् ।

शुक्रबारनै भएको जिल्लातर्फको मेन्स डबलकाे उपाधि त्रिपुरा सुन्दरी गाउँपालिकाका अभिषेक रिजाल र युवराज अधिकारीले प्राप्त गरे । विजेता जोडीले फाइनल भिडन्तमा प्रकाश श्रेष्ठ र रमेश श्रेष्ठ चौतारालाई २१–१२, २१–१९ को सोझो सेटमा पराजित गरे ।

उपाधिसँगै अभिषेक र युवराजको जोडीले ट्रफी सहित ४० हजार प्राप्त गरे । यस्तै उपविजेता प्रकाश र रमेशको जोडीले ३० हजार प्राप्त गरे ।

तेस्रो स्थान हात पार्न सफल अजय तामाङ र राजकुमार तामाङको जोडी तथा सुरेन्द्र श्रेष्ठ र कैलाश घलेको जोडीले ५–५ हजार प्राप्त गरे ।

यसअघिनै भएको जिल्लातर्फको मेन्स सिंगलको उपाधि विजेता अभिषेक गुरुङले ३० हजार प्राप्त गर्दा उपविजेता सुरेन्द्र श्रेष्ठले २० हजार प्राप्त गरे ।

यस्तै जिल्ला सिंगलतर्फ तेस्रो भएका रमेश श्रेष्ठ र अजय तामाङले ५–५ हजार प्राप्त गरे ।

कोरोना महामारिबीच मंसिर २१ गतेबाट संचालनमा आएको प्रतियोगिता शुक्रबार समापन भएको हो ।

समापन समारोहको मुख्य अथितीमा पूर्व कानुन मन्त्री तथा सांसद शेर बहादुर तामाङ, चौतारा सांगाचोकगढी नगरप्रमुख अमानसिंह तामाङ, ब्याडमिन्टन संघका अध्यक्ष राम जी श्रेष्ठ, ब्याडमिन्टन संघका उपाध्यक्ष तथा राखेप बोर्ड सदस्य शुबास श्रेष्ठ लगायतको सहभागीता रहेको थियो ।