अपेक्षा गरिएभन्दा कम मूल्यमा बिक्री भयो ‘ह्यान्ड अफ गड’ गोल गरेको बल

हेर्दा पुरानो। रंग उडेको र खेल्नसमेत नमिल्ने जस्तो देखिने एउटा फुटबल ठूलो मूल्यमा बिक्री भएको छ।

विशेषज्ञ लिलामीकर्ताका अनुसार यो अहिलेसम्म सुरक्षित रहेका सबैभन्दा महत्त्वपूर्ण फुटबल सामग्रीमध्ये एक हो। कारण, यही बलबाट अर्जेन्टिनाका महान् फुटबलर डिएगो म्याराडोनाले चर्चित ‘ह्यान्ड अफ गड’ गोल गरेका थिए।

अमेरिकाको हेरिटेज अक्सनमा उक्त फुटबल २.५ मिलियन पाउन्डमा बिक्री भएको हो, जुन नेपाली रुपैयाँमा ५२ करोड ३० लाख ७५ हजार रुपैयाँ हुन्छ।

सन् १९८६ को विश्वकपको क्वार्टरफाइनलमा अर्जेन्टिनाले इङ्ल्यान्डलाई २–१ ले हराएको थियो। त्यही खेलमा म्याराडोनाले विपक्षी गोलरक्षक पिटर शिल्टनलाई छल्दै हातले बल प्रहार गरेर गोल गरेका थिए।

खेलपछि उक्त गोलबारे म्याराडोनाले भनेका थिए, ‘गोल केही म्याराडोनाको टाउको र केही भगवानको हातबाट भएको हो।’

त्यही खेलमा म्याराडोनाले अर्को अविश्वसनीय गोल पनि गरेका थिए। उनले आफ्नै हाफबाट बल अघि बढाउँदै इङ्ल्यान्डका पाँच खेलाडीलाई छलाएर गोलरक्षक शिल्टनलाई समेत पराजित गरेका थिए। उक्त गोललाई पछि ‘शताब्दीकै उत्कृष्ट गोल’को रूपमा समेत चर्चा गरियो।

यद्यपि, लिलामीबाट प्राप्त रकम अपेक्षा गरिएभन्दा कम हो। लिलामी संस्थाका अनुसार बलले अपेक्षाभन्दा करिब ५ मिलियन पाउन्ड अर्थात् करिब १ अर्ब ४ करोड ६१ लाख ५० हजार नेपाली रुपैयाँ कम मूल्य पाएको छ।

यो फुटबल उक्त खेलका रेफ्री अली बिन नासेरले करिब तीन दशकसम्म सुरक्षित राखेका थिए। खेल सकिएपछि उनले एडिडास अज्टेका बल आफ्नो साथमा राखेका थिए। सन् २०२३ मा हस्ताक्षर गरिएको एउटा पत्रमार्फत उनले उक्त खेलमा एउटै बल मात्र प्रयोग भएको पुष्टि गरेका थिए।

बिन नासेरले सन् २०२२ मा उक्त बल १.७४ मिलियन पाउन्डमा बिक्री गरेका थिए। त्यसपछि नयाँ मालिकले २०२३ मा बललाई पुनः लिलामीमा राखेका थिए। तर‚ न्यूनतम मूल्यसमेत नआएपछि त्यसबेला बल बिक्री हुन सकेन।

म्याराडोनाले सोही खेलमा लगाएको जर्सी पनि सन् २०२२ मा भएको एक लिलामीमा ७.१ मिलियन पाउन्ड अर्थात् १ अर्ब ४८ करोड १३ लाख ९० हजार नेपाली रुपैयाँमा बिक्री भएको थियो।