नामिबियाले दक्षिण अफ्रिका र जिम्बाबेसँग टी–२० सिरिज खेल्ने

काठमाडौं। दक्षिण अफ्रिकाले नामिबिया भ्रमणका क्रममा युवा खेलाडीलाई अवसर दिँदै टोलीमा नेतृत्व परिवर्तन गरेको छ।

दक्षिण अफ्रिका, नामिबिया र जिम्बाब्वेबीचको त्रिदेशीय टी–२० सिरिज अगस्ट २८ देखि सुरु हुनेछ। त्यसपछि दक्षिण अफ्रिकाले आयोजक नामिबियासँग एकदिवसीय सिरिज खेल्नेछ।

यस भ्रमणका लागि दक्षिण अफ्रिकाको टी–२० तथा एकदिवसीय टोलीको कप्तानी बियर्न फोरटुइनलाई दिइएको छ। घरेलु क्रिकेटमा उत्कृष्ट प्रदर्शन गरेका अलराउन्डर डुआन जान्सेनले पहिलोपटक राष्ट्रिय टोलीमा स्थान बनाएका छन्।

उनी दक्षिण अफ्रिकी स्टार मार्को जान्सेनका जुम्ल्याहा भाइ हुन्। दक्षिण अफ्रिकाका दुवै मुख्य घरेलु सीमित ओभर प्रतियोगितामा प्रभावशाली प्रदर्शन गरेका डुआनले ५० ओभरको प्रतियोगितामा टाइटन्सलाई उपाधि दिलाउन महत्त्वपूर्ण योगदान गरेका थिए।

अलराउन्डर याथान बोश पनि टी–२० टोलीका नयाँ अनुहार हुन्। यस्तै, कोनर एस्तरहुइजेन, जोर्डन हरमन र एनकोबानी मोक्वेना पहिलोपटक एकदिवसीय टोलीमा परेका छन्। जोर्डन हरमनसँगै उनका भाइ रुबिन हरमनले पनि टोलीमा स्थान बनाएका छन्।

क्रिकेट दक्षिण अफ्रिकाका अनुसार जेसन स्मिथ सुरुमा त्रिदेशीय टी–२० सिरिजको टोलीमा समावेश थिए। तर‚ चोटका कारण उनी सिरिजबाट बाहिरिएका छन्। उनको स्थानमा भने हालसम्म कसैलाई समावेश गरिएको घोषणा गरिएको छैन।

दक्षिण अफ्रिका टोली

बियर्न फोरटुइन, याथान बोश, डेवाल्ड ब्रेभिस, टोनी डी जोर्जी, कोनर एस्तरहुइजेन, जोर्डन हरमन, रुबिन हरमन, डुआन जान्सेन, केना माफाका, एनकोबानी मोक्वेना, एनकाबा पिटर, लुआन–ड्रे प्रिटोरियस, लुथो सिपाम्ला, जेसन स्मिथ (स्वास्थ्यमा निर्भर) र प्रेनेलान सुब्रायेन।