नेपालको पहिलो जित

काठमाडौं। नेपाल ‘ए’ क्रिकेट टोलीले टप एन्ड टी–२० सिरिजमा पहिलो जित निकालेको छ।

सोमबार सम्पन्न खेलमा होबार्ट हुरिकेन्स एकेडेमीलाई नेपालले ३९ रनले पराजित गरेको हो। नेपालले दिएको १५५ रनको लक्ष्य पछ्याएको हुरिकेन्स १८.३ ओभरमा ११५ रनमै अलआउट भयो। जारी प्रतियोगितामा नेपालको यो पहिलो जित हो।

नेपाल पहिलो खेलमा नर्दन टेरिटोरी स्ट्राइकसँग आठ विकेटले पराजित भएको थियो। अर्को खेलमा बंगलादेश हाइ प्रफरमेन्स ११ सँग ९ विकेटको फराकिलो हार बेहोरेको थियो।

हुरिकेन्सका नितेश सामुएलले ३२ बलमा सर्वाधिक ३७ रन बनाए। टिम वार्डले २३ र निभेथन राधाकृष्णनले २० रन बनाए। अन्य ब्याटरले उल्लेख्य योगदान दिन नसक्दा टोली ११५ रनमै समेटियो।

नेपालका नारायण जोशीले घातक बलिङ गर्दै २ ओभरमा ८ रन खर्चेर ३ विकेट लिए। शाहब आलम र पवन सर्राफले समान २ विकेट लिए। बिपिन खत्रीले पनि १ विकेट लिए।

त्यसअघि डार्विनस्थित मरारा क्रिकेट ग्राउन्डमा टस जितेर पहिले ब्याटिङ गरेको नेपालले निर्धारित २० ओभरमा ८ विकेट गुमाउँदै १५४ रन बनाएको थियो। नेपालका कुशल भुर्तेलले सर्वाधिक ३९ रन बनाए। उनले ३४ बलमा ६ चौका प्रहार गरे।

मयन यादवले ३१ र कप्तान अनिलकुमार साहले २८ रनको योगदान दिए।

लोकेश बम १६ बलमा २० रन बनाएर अविजित रहे। त्रितराज दास १०, नारायण जोशी ४, पवन सर्राफ ३, बिपिन खत्री २ र युवराज खत्री १ रन बनाए। शाहब आलम १ रनमा अविजित रहे।

हुरिकेन्सका रफ म्याकमिलन उत्कृष्ट बलिङ गर्दै ४ ओभरमा १८ रन खर्चेर ३ विकेट लिए। मार्कस बिनले २ तथा ब्राडली होप र निभेथन राधाकृष्णनले १ विकेट लिए।