सजग एनरिके

काठमाडौं। फ्रान्सेली क्लब पेरिस सेन्ट–जर्मेन (पीएसजी)ले यस महिनाको सुरुआतमा युरोपियन सुपर कप जितिसकेको छ।

फ्रान्सेली सुपर कपमा भने रेसिङ लेन्ससँग पराजित भएको थियो। अब टोलीले लिग वानको उपाधि रक्षा गर्नुका साथै लगातार तेस्रो च्याम्पियन्स लिग उपाधि जित्ने लक्ष्य राखेको छ।

त्यसअघि पीएसजीका प्रशिक्षक लुइस एनरिकेले नयाँ सिजनमा खेलाडीहरूलाई विगतका सफलतामा भर नपरी हरेक खेल र प्रशिक्षणमा उत्कृष्ट प्रदर्शन गर्नुपर्ने बताएका छन्।

आइतबार लिग वानको नयाँ सिजनको पहिलो खेलमा पीएसजीले रेनेससँग २–२ को बराबरी खेलेको थियो। खेलको पहिलो हाफमै २–० ले पछि परेको पीएसजीका लागि नयाँ स्पेनिस खेलाडी फेरान टोरेसले दोस्रो हाफमा दुई गोल गर्दै टोलीलाई एक अंक दिलाए।

एनरिकेले पहिलो हाफपछि ओस्मान डेम्बेले र ख्भिचा क्वारात्स्खेलियालाई मैदानबाट बाहिर निकाल्दै मिका गोड्ट्स र टोरेसलाई मैदानमा पठाएका थिए। टोरेसले प्रशिक्षकको निर्णयलाई सही साबित गर्दै दुई गोल गरे।

एनरिकेले खेलाडीहरूलाई विगतको सफलताले आत्मसन्तुष्ट नबन्न चेतावनी दिँदै भने,‘फुटबल यस्तै हो। पीएसजीले केही पनि जितेको छैन। तपाईले हरेक दिन, हरेक खेल र हरेक प्रशिक्षणमा आफू जित्न तयार रहेको प्रमाणित गर्नुपर्छ।’

उनका अनुसार निरन्तर सफलता हासिल गर्न खेलाडीहरूले आफ्नो सहज क्षेत्रबाट बाहिर निस्कन आवश्यक छ। ‘यदि तपाईले आफूले के जितिसक्नुभएको छ भनेर सोच्न थाल्नुभयो भने, तपाई केही पनि जित्नुहुन्न। सधैं जितिरहन आफ्नो कम्फर्ट जोनबाट बाहिर निस्कनुपर्छ,’ उनले भने।

रेनेसविरुद्ध पीएसजीले पहिलो हाफमा विपक्षीको काउन्टर–अट्याक रोक्न संघर्ष गरेको एनरिकेले स्वीकार गरे। यद्यपि, दोस्रो हाफमा बेन्चबाट आएका खेलाडीहरूले टोलीलाई खेलमा फर्काउन महत्त्वपूर्ण भूमिका खेलेकोमा उनी खुसी देखिए।

टोरेसको डेब्यु प्रदर्शनको प्रशंसा गर्दै एनरिकेले उनीबाट दुई गोल हुनु सकारात्मक सुरुआत भएको बताए। उनले नयाँ खेलाडीहरूलाई दीर्घकालीन योजनाका लागि अनुबन्ध गरिएको र टोलीमा स्थान पाउन यस सिजन पहिलेभन्दा कठिन हुने पनि बताए।

एनरिकेले यस सिजनको खेलाडी छनोटमा प्रतिस्पर्धा अझ कडा हुने र क्लबले राम्रो ट्रान्सफर विन्डो पूरा गरेको बताए। यद्यपि, उनले टोली अझै सुधार गर्नुपर्ने र ट्रान्सफर बजारमा थप सम्भावनाका लागि क्लब खुला रहेको स्पष्ट पारे।