‘अर्काे वर्ष महिलालाई पनि समावेश गर्छाै’

सिन्धुपाल्चोक । सरकारले गत चैत ११ गते देशमा लकडाउन घोषणा गरेसँगै खेलकुद क्षेत्र समेत ठप्प रह्यो ।

कोरोना महामारीकै कारण खेलाडी करिब ९ महिना घरमै थन्किए । मैदानसम्म आउने वातावरण बनेन । खेलाडीको फिटनेस शुन्यमा पुग्न लागेको अवस्था थियो । फिटनेशमा आफु कमजोर भैसकेको प्रतिक्रिया खेलाडीले दिन थालिसकेका थिए ।

लकडाउनको ५–६ महिनापछि सरकारले लकडाउन र निषेधाज्ञालाई खुकुलो बनाउँदा जनजिवन पनि समान्य बन्दै थियो । तर खेलकुद क्षेत्र फर्कने कुनै आधार बनेको थिएन । खेलाडी घरमै दिन बिताउन बाध्य थिए ।

सरकारले गत महिना मात्रै खेलकुद क्षेत्रलाई समेत प्रशिक्षणका लागि स्विकृती प्रदान गर्याे । तर अखिल नेपाल फुटबल संघ (एन्फा) र नेपाल क्रिकेट संघ (क्यान) बाहेक अन्य संघले त्यसलाई ध्यानमा राखेनन् ।

यस्तो अवस्थामा नेपाल ब्याडमिडन्टन संघले भने आफ्ना खेलाडीलाई त्रिपुरेश्वरस्थित कभर्डहलमा प्रशिक्षणमा राख्यो ।

विदेशी प्रशिक्षकको प्रशिक्षणमा खेलाडीले अभ्यास त गरे, तर प्रतिस्पर्धा गर्ने कुनै प्रतियोगिता हुने छाटकाट रहेन । तर पनि खेलाडीले प्रशिक्षण रोकनन् ।

संघले प्रशिक्षणको अनुमति दिएपनि खेलाडीले आफ्नो कौशलता प्रस्तुत गर्ने स्थान पाएका थिएनन् ।

यस्तो अवस्थामा सिन्धुपाल्चोक जिल्लाको सदरमुकाममा रहेको ‘तोप–२१’ क्लब खेलाडीको लागि मौका बनेर आयो ।

जिल्लामा खेलकुद क्षेत्रको लागि अग्रणी काम गरिरहेको ‘तोप–२१’ र चौतारा नगरपालिकाले यस बर्ष ब्याडमिन्डन आयोजना गर्ने निर्णय गरे । जसको प्रत्यक्ष फाइदा खेलाडीलाई भएको छ ।

आर्थिक पाटोसँगै खेलाडीलाई आफ्नो फिटनेश मापन गर्ने माध्यम बनेको छ, ’तेस्रो चौतारा साँगागढीचोक मेयर कप तथा प्रथम तोप–२१ ब्याडमिन्टन प्रतियोगिता’ ।

जिल्लासँगै यस प्रतियोगितामा राष्ट्रिय खेलाडीले सहभागीता जनाएका छन् । तोप २१ ले पहिलो पटक आयोजना गरेको यस प्रतियोगितामा जिल्लातर्फ पुरुष एकल र युगल जोडी साथै राष्ट्रिय पुरुष एकल बिधा रहेका छन् । यस प्रतियोगितालाई नेपालकै ठुलो धनराशीको प्रतियोगिताको रुपमा लिईएको छ ।

यसअघि फुटबल प्रतियोगिता आयोजना गर्दै आएको तोप–२१ ले पहिलो पटक ब्याडमिन्टन आयोजना गरेको हो । जिल्लासँगै देशभर खेलकुद नहुँदा तोप–२१ ब्याडमिन्टन फर्काउने पहिलो आयोजक समेत बन्यो ।

‘प्रतियोगिता उल्लासमय छ । विशेष गरि कोरोना महामारीका कारण रोकिएको खेलकुदलाई उद्गम बिन्दु चौतारलाई बनाएर गर्न सकिन्छ । कसरी गर्न सकिन्छ त भनेर उदारण प्रस्तुत गर्न प्रतियोगिता आयोजना गरेका हौं । जहाँसम्म लाग्छ हामी सफल भएको छौं ।’ तोप–२१ क्लबका अध्यक्ष अशोक कार्कीले खेलपाटीसंग भने ।

युवा विश्व चर्चित खेलाडी प्रिन्स दाहाल र नेपाल नम्बर वान खेलाडी रत्नजित तामाङ प्रतियोगितामा सहभागी हुँदा आयोजक ‘तोप–२१’ र सँगै प्रतियोगिताको सोभा समेत बढेको छ ।

‘तोप–२१’ ले यसअघिनै दुई सिजन राष्ट्रब्यापी फुटबल आयोजना समेत गर्याे । काठमाडौंबाट ए र बी डिभिजनका टोली चौतारामा झिकाएर प्रतियोगिताको सफल आयोजना गरेको उसले यस पटक कोरोना महामारीकै कारण ब्याडमिन्टन आयोजना गर्ने निर्णय गर्याे ।

’यसअघि दुई पटक फुटबल आयोजना गर्याै । फुटबलमा धेरै दर्शक हुने । दर्शक बिना फुटबल गर्न सकिदैन । दर्शक धेरै झिकाउन पनि हुन्न । यस्तो बेला (कोरोना) गर्न सक्ने भनैकै ब्याडमिन्टन हो । हाम्रो जिल्लामा फुटबलपछि उपयुक्त खेल हुने भनेकै ब्याडमिन्टन हो । त्यसैले आयोजना गर्याै ।‘ कार्की भन्छन् ।

पहिलो पटक राष्ट्रिय स्तरको प्रतियोगिता आयोजना गरेको ‘तोप–२१’ का अध्यक्ष अशोक कार्की सोही स्तरको प्रतियोगितालाई कसरी निरन्तरता दिने भन्ने बिषयमा चिन्तित छन् ।

’यो स्तरको प्रतियोगिता आयोजना गरेपनि यसलाई कसरी निरन्तरता दिने बन्ने दबाब छ ।’ उनी भन्छन् ।

जिल्लासँगै राष्ट्रिय पुरुष खेलाडीले खेल्दा महिला खेलाडीलाई समावेश गरिएन । खेलमा फर्कन नपाउँदा महिला खेलाडी चिन्तित नहुने कुरै भएन । तर आयोजकले महिलाको बिषयमा यस पटक नसकेपनि अर्काै बर्ष निरन्तरता दिने बताएको छ ।

‘महिलालाई प्राथमिकतामा नराखेको भन्न मिल्दैन । योजना बनाउने क्रममा हाम्रो विवशता, बाध्यता पनि भन्नुपर्छ । आगामी बर्ष छुटेको वुमेन्स च्याम्पियनसिप आयोजना गर्नेछौं । यो हाम्रो प्रतिबद्धता हो ।’ कार्की भन्छन् ।

यता, क्लबका सविच दिपक राई ब्याडमिन्टनसँगै भलिबल आयोजना गर्ने योजना आफ्नो क्लबको रहेको र कभर्डहल अभावका कारण भलिबल खेलाउन नपाएको बताउँछन् ।

’हाम्रो योजना ब्याडमिन्टनसँगै भलिबल पनि थियो । कभर्डहल अभावका कारण ब्याडमिन्टन मात्रै आयोजना गर्याै । आगामी दिनमा दुबै गर्ने गरि तयारी गछौं ।’ सविच राईले भने ।

अध्यक्ष कार्की प्रतियोगितालाई लिएर खेलाडी सहित स्थानिय निकै खुसी रहेको र आगामी दिनमा खेलसँगै आफ्नो क्लब शिक्षा, स्वास्थ्यमा पनि अग्रसर रहने बताउँछन् ।

‘खेलाडीको उत्साहजनक सहभागी रहेको छ । धन्यबाद पाएका छौं । धेरै पछि खेलाडीलाई पनि फर्कने मौका रह्यो । सबै खुसी हुनुहुन्छ ।’ उनले भने ।

‘तोप २१ ले खेलकुदसँगै शिक्षा क्षेत्रमा पनि केहि गर्छ । हामीले अब लगत्तै नेपालमै नौलो कार्यक्रम ल्याउने योजना बनाएका छौं । हामीसँग स्वास्थ्यसँग सम्बन्धित कार्यक्रम पनि छ ।’ कार्की थप्छन् ।