प्रिन्सको विजयी सुरुवात

सिन्धुपाल्चोक । युवा खेलाडी प्रिन्स दाहालले तेस्रो चौतारा साँगाचोकगढी मेयरकप तथा प्रथम तोप–२१ ब्याडमिन्टन प्रतियोगिता’ को राष्ट्रिय मेन्स सिंगलमा विजयी सुरुवात गरेका छन् ।

बुधबार सिन्धुपाल्चोकको सदरमुकाम चौतारामा भएको मेन्स सिंगलतर्फ पहिलो खेलमा प्रिन्सले गोकुल जोरालाई पराजित गर्दै सुखद् सुरुवात गरेका हुन् ।

त्रिभुवन आर्मी क्लबका जोरालाई प्रिन्सले २१–७, २१–९ ले पराजित गरे ।

अब प्रिन्सले सेमिफाइनल प्रवेशका लागि आर्मीकै प्रविन लिंथेपसँग प्रतिस्पर्धा गर्नेछन् ।

बुधबारनै भएको खेलमा प्रविनले रामेछापका टिकाराम राना मगरलाई २१–४, २१–६ को सोझो सेटमा पराजित गर्दै प्रिन्ससँगको भेट पक्का गरे ।

अन्य खेलमा नेपाल पुलिस क्लबका जिवन आचार्य, आर्मी क्लबका प्रफुल्ल महर्जन, आर्मीकै नविन श्रेष्ठ, आर्मीकै रुकेश महर्जन र एपीएफ क्लबका राजन कृष्ण ताम्राकार विजयी भए ।

पुलिसका जिवनले जिल्ला मेन्स सिंगलतर्फ विजेता सिन्धुपाल्चोकका अभिषेक रिजाललाई २१–१३, २१–१० को सोझो सेटमा पराजित गरे । यस्तै आर्मीका प्रफल्लले रुपन्देहीका डेभिड थापा मगरलाई २१–१२, २१–१३ को सोझो सेटमै पराजित गरे ।

आर्मीकै नविनले आर्मीका प्रियन्सु सिंह क्षेत्रीलाई २१–१७, २१–१४ को सोझो सेटले पराजित गरे ।

आर्मीका रुकेशले आर्मीकै आयुष्मान नगरीलाई २१–१८, २१–१६ को सोझो सेटमा पराजित गरे । दिनको अन्तिम खेलमा एपीएफका साजन कृष्ण ताम्राकारले एपीएफकै निराजन देभकोटालाई २१–९, २१–१३ ले पराजित गरे ।

चौतारा साँगाचोकगढी नगरपालिकाको मुख्य प्रायोजनमा चलिरहेको प्रतियोगितामा जिल्ला स्तरका लागि पुरुष एकल र युगल तथा राष्ट्रिय स्तरका लागि पुरुष एकल गरि तीन विधामा प्रतिस्पर्धा गराईएको छ ।

पहिलो चरणमाको जिल्ला पुरुष एकलको उपाधि त्रिपुरा सुन्दरी गाउँपालिकाका अभिषेक गुरुङले पोल्टामा पारेका छन् । यस्तै युगल जोडी तर्फ प्रकाश श्रेष्ठ र रमेश श्रेष्ठ तथा अभिषेक गुरुङ र युवराज अधिकारीको जोडी २६ गते उपाधिका लागि भिड्नेछन् ।

दोश्रो चरणको राष्ट्रिय स्तरको पुरुष एकल प्रतियोयगता भने बुधबारबाट सुरुभएको हो । पहिलो दिन प्रि-क्वाटरफाइनलका खेल आयोजना भए ।

राष्ट्रिय स्तरको पुरुष एकल तर्फको बिजेताले नगद १ लाख ११ हजार १ सय ११ प्राप्त गर्ने छन् भने उपबिजेताले नगद ५५ हजार ५ सय ५५ प्राप्त गर्ने छन् । यस्तै सेमिफाईनलिस्ट (तृतीय स्थान) दुई जनाले जनही १० हजार प्राप्त गर्ने छन् ।

युगलतर्फ बिजेता जोडीले ४० हजार, उपबिजेता जोडीले ३० हजार र सेमिफाईनलिस्ट दुई जोडीले ५-५ हजार प्राप्त गर्नेछन् ।