मण्डेकाजी र आयषासहित ७ खेलाडीलाई राष्ट्रिय प्रतिभा सम्मान

काठमाडौं । युवा तथा खेलकुद मन्त्रालयले १३ औं दक्षिण एशियाली खेलकुद (साग) मा दोहोरो स्वर्ण विजेता मण्डेकाजी श्रेष्ठ र आयषा शाक्यसहित ७ खेलाडीलाई राष्ट्रिय प्रतिभा सम्मान पुरस्कारबाट पुरस्कृत गर्ने भएको छ ।

मन्त्रालयले शुक्रबार करातेका मण्डे र तेक्वान्दोकी आयषासहित ७ खेलाडीलाई राष्ट्रिय प्रतिभा सम्मानबाट पुरस्कृत गरिने जनाएको छ ।

पुरस्कृत हुने अन्य खेलाडीमा साईकिलिङ्गकी लक्ष्मी मगर, गल्फका सुवास तामाङ, एथ्लेटिक्सकी सन्तोषी श्रेष्ठ, शारीरिक सुगठनका समिर श्रेष्ठ र भारोत्तोलनका विकास थापा रहेका छन् ।

यस्तै कराते प्रशिक्षक कुशल श्रेष्ठ र तेक्वान्दो प्रशिक्षक नविन कुमार श्रेष्ठलाई समेत पुरस्कृत गरिने मन्त्रालयले जनाएको छ ।

जुडोका निर्णायक धर्म कुमार श्रेष्ठ, चिकित्सक डा. ज्ञानेन्द्र विक्रम शाह, नेपाल गल्फ संघ, काठमाडौं महानगरपालिका र खेल प्रायोजक कतार एयरवेजलाई समेत सम्मान गरिनेछ ।

मन्त्रालयले आवेदन आएका २७ खेलाडी, १२ खेल प्रशिक्षक, ३ खेल निर्णायक, ४ खेल व्यवस्थापक र चिकित्सक, २ खेल संघ र विधा नखुलेका ४ गरी जम्मा ५२ बाट पुरस्कृत हुनेको नामावली छनोट गरिएको जनाएको छ ।

राष्ट्रिय खेलकुद प्रतिभा सम्मान कार्यविधि २०६८, ९ तेस्रो संशोधन २०७५० बमोजिम ९ सदस्य रहेको समितिबाट प्राप्त भएका आवेदनहरुको मूल्याकंन गर्दा उच्चतम अंक प्राप्त गर्नेलाई पुरस्कृत गर्न लागिएको मन्त्रालयले जनाएको छ ।

सम्मान प्राप्त गर्नेको सूची -