रोजर्सको गोलसँगै चेल्सीको विजयी सुरुआत
काठमाडौं– चेल्सीले नयाँ प्रशिक्षक जाबी अलोन्सोको नेतृत्वमा प्रिमियर लिगको नयाँ सिजन विजयी सुरुआत गरेको छ।
सोमबार भएको खेलमा चेल्सीले फुलह्यामलाई ३–२ गोलले पराजित गर्यो। क्लबको कीर्तिमानी रकममा अनुबन्ध भएका मर्गन रोजर्सले डेब्यु खेलमै गोल गर्दै टोलीको जितमा महत्त्वपूर्ण योगदान दिए।
खेल सुरु भएको ३२ सेकेन्डमै ब्राजिलियन खेलाडी जोआओ पेड्रोले गोल गर्दै चेल्सीलाई अग्रता दिलाएका थिए। तर‚ पहिलो हाफको मध्यतिर जोस किङले गोल गर्दै फुलह्यामलाई खेलमा फर्काए।
पहिलो हाफ सकिँन चार मिनेटअघि रोजर्सले म्याक्सेन्स लाक्र्वाको उत्कृष्ट ‘कटब्याक’मा गोल गर्दै चेल्सीलाई पुनः २–१ को अग्रता दिलाए। एस्टन भिल्लाबाट गत महिना चेल्सीमा आएका रोजर्सका लागि यो डेब्यु खेलमै आएको महत्त्वपूर्ण गोल थियो।
दोस्रो हाफ सुरु भएको चार मिनेटपछि कोल पाल्मरले जोआओ पेड्रोको पासमा उत्कृष्ट फिनिसिङ गर्दै चेल्सीको अग्रता ३–१ बनाए। तर‚ फुलह्यामले केही समयमै गोल फर्कायो। गोलरक्षक सान्चेजले टिमोथी कास्टान्येको ‘लो क्रस’ रोक्ने प्रयास गरे पनि बल पूर्ण रूपमा नियन्त्रण गर्न नसकेपछि गोन्जालो गार्सियाले हेडमार्फत गोल गरे।
त्यसपछि फुलह्यामले बराबरी गोलका लागि लगातार दबाब सिर्जना गरे पनि चेल्सीले अग्रता जोगाउन सफल भयो। चेल्सीका प्रशिक्षक अलोन्सोले खेलपछि आफ्नो टोलीको आक्रमणपंक्तिको प्रदर्शनको प्रशंसा गर्दै पहिलो खेलबाट आफू सन्तुष्ट रहेको बताए।
उनले पेड्रो, रोजर्स र पाल्मरको संयोजन तथा उनीहरूको सिर्जनात्मक क्षमताले विशेष प्रदर्शन गर्न सक्ने उल्लेख गरे। यस खेलमा अलोन्सोको सामना उनका रियल मड्रिड तथा स्पेनका पूर्वसहकर्मी आल्भारो अर्बेलोआसँग भएको थियो। अर्बेलोआ पनि फुलह्यामको प्रशिक्षकका रूपमा पहिलो खेलमा थिए।
पराजित भए पनि अर्बेलोआले आफ्नो टोलीले अझ राम्रो नतिजा पाउनुपर्ने धारणा राखे। उनले खेलाडीहरूको रवैयाबाट आफू सन्तुष्ट रहेको बताउँदै फुलह्यामले आगामी खेलमा पनि आक्रामक शैलीलाई निरन्तरता दिने बताए।
चेल्सीले नयाँ खेलाडीहरूमा ३० करोड पाउन्डभन्दा बढी खर्च गरिसकेको छ। नयाँ सिजनमा चेल्सीलाई साविक विजेता आर्सनललाई चुनौती दिन सक्ने प्रमुख टोलीमध्ये एकका रूपमा हेरिएको छ।
