रोमाको जितमा मालेनको ह्याट्रिक
काठमाडौं। डोनियल मालेनको ह्याट्रिकसँगै रोमाले सिरी ‘ए’ को नयाँ सिजनमा सानदार सुरुआत गरेको छ।
सोमबार भएको खेलमा रोमाले फियोरेन्टिनालाई ४–० गोलले पराजित गर्यो। मालेनले पाउलो डिबालाबाट प्राप्त तीनवटा पासलाई सदुपयोग गर्दै २७औं, ५२औं र ६०औं मिनेटमा गोल गरे।
उनको ह्याट्रिकसँगै रोमाले सिरी ‘ए’ को पहिलो खेलमै प्रभावशाली प्रदर्शन गर्दै तीन अंक जोड्यो। निकोलो पिसिलीले खेल सकिन चार मिनेट बाँकी रहँदा चौथो गोल थपे। यस जितसँगै रोमा पहिलो चरणपछि पूर्ण तीन अंक हासिल गर्ने नौ टोलीमध्ये एक बनेको छ।
राजधानीकै अर्को टोली लाजियोले बोलोग्नालाई १–० ले पराजित गर्यो। लाजियोका लागि नयाँ खेलाडी डाभिदे फ्राटेसीले दोस्रो हाफमा मैदान प्रवेश गरेपछि डेब्यु खेलमै निर्णायक गोल गरे।
उनले ५१औं मिनेटमा बुलेए डियाको उत्कृष्ट ‘ब्याकहिल’ पासलाई सदुपयोग गर्दै शान्त शैलीमा गोल गरे। उक्त गोल लाजियोलाई तीन अंक दिलाउन पर्याप्त भयो।
खेलमा गोलका अवसर निकै कम बनेका थिए भने कुल आठ पहेंलो कार्ड देखाइयो। पहिलो हाफमै पाँच खेलाडीले पहेंलो कार्ड पाए।
नयाँ प्रशिक्षक जेन्नारो गाटुजोका लागि यो जित राहतपूर्ण रह्यो। यसअघि एक साताअघि मात्रै लाजियो इटालियन कपमा सिरी ‘बी’ क्लब मान्टोभासँग स्तब्ध हुँदै बाहिरिएको थियो।
