भलिबलकी प्रतिभालाई कोषको २ लाख सहयोग

काठमाडौं । राष्ट्रिय खेलाडी कल्याणकारी कोषले राष्ट्रिय भलिबल टिमकी सदस्य प्रतिभा मालीलाई २ लाख रुपैयाँ सहयोग गरेको छ ।

खेलको दौरान चोट बोकेर उपचार गराईरहेकी प्रतिभालाई कोषले २ लाख रुपैयाँ सहयोग गरेको हो ।

कोषका सदस्य सचिव तथा राष्ट्रिय तथा अन्तराष्ट्रिय खेलाडी संघका अध्यक्ष दिपक श्रेष्ठले सातदोबाटोस्थित अर्थाेपेडिक रिहाब सेन्टरमा पुगेर प्रतिभालाई २ लाख रुपैयाँको चेक हस्तान्तरण गरेका हुन् ।

अध्यक्ष श्रेष्ठ सहित पूर्व अध्यक्ष दिपक विष्ट, आयशा शाक्य सहितको टोली सातदोबाटो पुगेर प्रतिभालाई सहयोग रकमको चेक हस्तान्तरण गरेको हो ।

पाँचौ संस्करणको आरबीबी एनभीए राष्ट्रिय महिला तथा पुरुष क्लब भलिबल च्याम्पियनसिपको फाईनल खेलको दौरान प्रतिभाले खुट्टामा चोट बोकेकी थिईन् । उनको खुट्टाको मांशपेशी च्यातिएपछि सल्यक्रिया समेत गरिएको थियो ।

चिकित्सकले उनलाई करिब एक बर्ष मैदान बाहिर रहने बताएका थिए । प्रतिभा अहिले पुर्नस्थापना केन्द्रमा दैनिक अभ्यास गर्दै मैदान फर्कने दिन पर्खिएर बसेकी छिन् ।

उनको उपचारको सम्पूर्ण खर्च राष्ट्रिय खेलकुद परिषद् (राखेप)ले ब्यहोरेको हो । परिषद्का तत्कालिन सदस्य सचिव रमेश सिलवालले प्रतिभाको उपचारको सम्पूर्ण खर्च राखेपले ब्यहोर्ने घोषणा गरेका थिए ।

तर सल्यक्रियापछि दैनिक अभ्यास र उपचारमा थप खर्च लाग्ने देखिएपछि राष्ट्रिय खेलाडी कल्याणकारी कोषले प्रतिभालाई आर्थिक सहयोग गर्ने निर्णय गरेको थियो ।

प्रतिभा घरेलु भलिबलकी नम्बर एक स्पाईकर छिन् । उनकै प्रेरणादायी प्रर्दशनमा नेपालको महिला भलिबलले एभीसी सेन्ट्रल जोनमा स्वर्ण पदक सहित १३ औं साग खेलकुदमा ऐतिहासिक रजत पदक प्राप्त गरेको थियो ।

घरेलु भलिबलमा न्यु डायमण्ड एकेडेमीबाट खेल्ने प्रतिभा समकालिन महिला भलिबलकी उत्कृष्ट खेलाडी मानिन्छिन् ।

कोषका सदस्य सचिव दिपक श्रेष्ठले पुर्नस्थापनाको क्रममा रहेकी प्रतिभालाई थप खर्च लाग्ने देखिएपछि कोषबाट रकम सहयोग गरिएको खेलपाटीलाई बताए ।

'राखेपले उपचारमा सहयोग गरेको छ । तर थप खर्च लाग्ने देखिएपछि कोषबाट उनलाई सहयोग गरिएको हो ।' श्रेष्ठले भने ।

कोषको रकम खेलाडीले थप सदुपयोग गरुन् – श्रेष्ठ

राष्ट्रिय तथा अन्तराष्ट्रिय खेलाडी संघका अध्यक्ष दिपक श्रेष्ठले राष्ट्रिय खेलाडी कल्याणकारी कोषको रकम खेलाडीले भरपुर सदुयोग गरुन् भन्ने आफुहरुको ईच्छा रहेको बताएका छन् ।

पर्याप्त जानकारी नहुँदा कोषको रकम खेलाडीले प्राप्त गर्न नसकेको भन्दै श्रेष्ठले चोट सहित आर्थिक समस्यामा परेका खेलाडीले कोषमा सम्पर्क गर्न अनुरोध गरेका हुन् ।

खेलाडीमा आईपर्ने आर्थिक समस्यालाई मदत पुर्याउने उद्धेश्यले सरकारले राष्ट्रिय खेलाडी कोष स्थापना गरेको थियो । मन्त्रीपरिषद्ले कोषको कार्यविधि समेत पारित गर्दै समस्यामा परेका खेलाडीलाई आर्थिक सहयोग गर्दै आएको छ ।

कोषका अध्यक्षमा राखेप सदस्य सचिव र कोषको सदस्य सचिवमा राष्ट्रिय तथा अन्तराष्ट्रि खेलाडी संघका अध्यक्ष रहने ब्यवस्था छ ।

तत्कालिन सदस्य सचिव जिवनराम श्रेष्ठले पाँचौ राष्ट्रिय खेलकुद आयोजनाको दौरान खर्च हुन बाँकी रहेको रकम मध्य १ करोड रुपैयाँ खेलाडी कल्याणकारी कोषका लागि छुट्याएका थिए । कोषले २०७२ सालको भुकम्पको दौरान आर्थिक समस्यामा परेका खेलाडीका घर परिवारलाई २७ लाख रुपैयाँ वितरण समेत गरेको थियो ।

कोषले १ करोड ४० लाख रुपैयाँ बैंकमा ‘फिक्स डिपोजिट’ गरेको छ । जसबाट बार्षिक रुपमा कोषलाई ब्याज प्राप्त हुन्छ । सोही ब्याजको रकम कोषले खेलाडीमा खर्च गर्दै आएको छ ।

कोषका सदस्य सचिव श्रेष्ठले खेलाडीले कोषका बिषयमा जानकारी राख्नुपर्ने उल्लेख गर्दै यसको रकम भरपुर उपयोग गरुन् भन्ने ईच्छा रहेको बताएका छन् ।

चोट सहित आर्थिक समस्यामा परेका खेलाडीले कोषमा सम्पर्क राख्न सक्नेछन् । कोषले कार्यविधि अनुसार वास्तविक समस्यामा परेका खेलाडीलाई आर्थिक सहयोग प्रदान गर्नेछ ।