सर्वाधिक राशीको अन्तर 'प्लस टू' फुटसल आईतबारबाट

काठमाडौं । सर्वाधिक पुरस्कार राशीको पहिलो अन्तर 'प्लस टू' फुटसल प्रतियोगिता आईतबार सुरु हुने भएको छ ।

भिजन मिडिया इनकर्पोरेशनको आयोजनामा सञ्चालन हुने प्रतियोगिता दुई दिनसम्म काठमाडौंमा चल्नेछ ।

प्रतियोगितामा उपत्यकाका १७ कलेजले सहभागीता जनाउने पक्का गरेका छन् ।

विजेताले उपाधि सहित १ लाख २५ हजार रुपैयाँ प्राप्त गर्नेछ । उपविजेताले ६० हजार र तेस्रो हुने टिमले ३० हजार रुपैयाँ प्राप्त गर्नेछ ।

यस्तै, उत्कृष्ट खेलाडी, उत्कृष्ट गोलकिपर र सर्वाधिक गोलकर्ताले जनही १० हजार रुपैयाँ प्राप्त गर्नेछन् ।

आयोजक भिजन मिडियाका निर्देशक जिवन लामा गोलेले कलेज स्तरमा रहेको विद्यार्थीलाई खेलकुदमा सहभागी गराउने उद्धेश्यले प्रतियोगिता आयोजना गरिएको जानकारी दिए ।

'समयको चापले गर्दा निकै हतारमा सर्वाधिक धनराशीको पहिलो संस्करणको आयोजना गरेका छौ । अर्को बर्ष अझ व्यवस्थित र भब्य कार्यक्रम लिएर विद्यार्थीमाझ आउनेछौ ।' उनले भने ।

लिग कम नकआउटका आधारमा सञ्चालन हुने प्रतियोगिताका सहभागी टिमलाई चार समूहमा विभाजन गरिएको छ ।

समूह एमा टेक्सास, टाईम्स, साईपाल र सीसीआरसी रहेका छन् । त्यस्तै, समूह बीमा न्यु जेनिथ, क्यारेबियन, केइबीएस र केभिएस छन् ।

समूह सीमा लिन्कन, निष्ट, लोयल्टी र गोल्डेन गेट छन् । त्यस्तै, समूह डीमा प्रिमियर, एसओएस, पासाङ ल्हामु, ओमेगा र टीआईभीएस रहेका छन् ।

प्रतियोगिताको उद्घाटन खेलमा टेक्सास र टाईम्स तथा लिन्कन र निष्ट कलेज भिड्नेछन् । प्रतियोगिताका सम्पूर्ण खेल महाराजगञ्जस्थित ढुकु फुटसल हबमा हुनेछ ।

प्रतियोगिताको मुख्य प्रायोजकमा हब एजुकेशन कन्सलटेन्सी रहेको छ ।

यस्तै, थेम्स कलेज, हेराल्ड कलेज, ईम्पेरियल कलेज, प्राईम एजुकेशन, केआईसी कलेज, सानिमा लाईफ ईन्स्योरेनस र वर्गर स्याकले प्रायोजकको रुपमा प्रतियोगितालाई सहयोग गरेका छन् ।

खेलपाटी डटकमले मिडिया पार्टनरको रुपमा प्रतियोगितालाई सघाउनेछ ।