फाइनलमा अरहान्त र अमृत भिड्ने

काठमाडौं । राजधानीमा जारी तेस्रो धनलक्ष्मी महर्जन स्मृति राष्ट्रिय स्क्वास प्रतियोगिताको पुरुष सिंगल्सको फाइनलमा साबिकको विजेता अरहान्त केशर सिंह र अमृत थापा मगरले प्रतिस्पर्धा गर्ने भएका छन् ।

सातदोबाटोस्थित स्क्वास कोर्टमा शुक्रबार भएको सेमिफाइनलमा अरहान्तले राजेन्द्र शाक्यलाई ३ – ० को सेटमा हराएर फाइनलमा स्थान बनाएका हुन् ।  अरहान्त र राजेन्द्र दुवै इन्डोनेसियामा हुने एसियन गेम्समा सहभागी  हुने खेलाडी हुन् । 

पुरुष सिंगल्सतर्फ नै अमृतले प्रवीणवीर सिंह कंशाकारलाई पनि ३ – ० ले हराएर शनिबार हुने फाइनलमा स्थान पक्का गरेका थिए । अमृत पनि एसियन गेम्समा सहभागी हुने नेपाली खेलाडी हुन् । 

महिला सिंगल्सको फाइनलमा साविकको विजेता भावना सुनुवार र कृष्णा थापाले खेल्ने छन् । यु–१५ ब्वाइज सिंगल्समा विकास मगर र सलिन थापा मगरले फाइनलमा प्रतिस्पर्धा गर्दा  गल्र्समा सपना ब्लोन र मुस्कान राउतले खेल्ने छिन् ।

मास्टर्स ५० वर्षमाथि सिंगल्सको फाइनलमा दिलिप नाथ अधिकारी र सुदीपबहादुर सिंहले खेल्ने छन्  । सेमिफाइनलमा दिलिपले इन्द्र बहादुर कार्कीलाई ३ – १ र सुदीपले सुरेश गुरुङलाई ३ – १ ले नै पराजित गरे । यस्तै प्लेट च्याम्पियनसिपमा स्टिभ फ्रान्सिस र अमीर ब्लोनले खेल्ने छन् ।

पाँच दिने प्रतियोगितामा पुरुषतर्फको बिजेताले १८ हजार, उपबिजेताले १० हजार र तेस्रो र चौथो हुनेले ४ - ४ हजार पाउने छन् । महिलातर्फ बिजेताले ११ हजार, उपबिजेताले ६ र तेस्रो र चौथोले समान ३ - ३ हजार पाउने छन् । यस्तै उमेर समूहका बिजेताले पनि नगद पुरस्कार पाउने छन् ।