बागमतीलाई स्क्वासको महिला टिम इभेन्टमा उपाधि

काठमाडौं। १३औं एनआरएनए राष्ट्रिय स्क्वास प्रतिगोयताको महिला टिम इभेन्टको उपाधि बागमती प्रदेशले जितेको छ।

नेपालका नम्बर एक बिपना ब्लोन र नम्बर दुई स्वस्थानी श्रेष्ठ सामेल बागमती कोशी प्रदेश, गण्डकी प्रदेश र कर्णाली प्रदेशलाई समान ३–० ले हराएर समूहको शीर्ष स्थानमा रहेर च्याम्पियन बनेको हो। 

चार प्रदेश सहभागी महिला टिम इभेन्टमा सबैले एक अर्कासँग खेलेपछि शीर्ष स्थानमा रहने टिमले उपाधि जित्ने प्रावधान रहेको छ। महिला टिम इभेन्टमा रजत र कांस्य पदकको छिनोफानो हुन भने बाँकी छ।

कोशी प्रदेशविरुद्धका खेलमा बागमतीका लागि स्वस्थानीले डोल्मा तामाङलाई ११–८, ११–५ र ११–४, विपनाले रचना प्रजालाई ११–४, ११–५ र ११–४ तथा अस्मिता नगरकोटीले तारादेवी गुरुङलाई ११–३, ११–१ र ११–२ ले पराजित गरे। यसै गरी गण्डकीविरुद्ध तीन खेल जित्ने क्रममा स्वस्थानीले रेसना महर्जनलाई ११–३, ११–५ र ११–३, विपनाले समीक्षा खाँडलाई ११–२, ११–२ र ११–५ तथा अस्मिताले नियुक्ति श्रेष्ठलाई ११–१, ११–५ र ११–६ ले हराए।

कर्णालीविरुद्धको खेलमा स्वस्थानीले भगवती जिसीलाई ११–२, ११–१ र ११–३, विपनाले प्रतीक्षा प्रजालाई ११–३, ११–५ र ११–५ तथा साक्षी सुनुवारले अर्पणा प्रजालाई ६–११, ११–७, ११–६ र ११–३ ले निराश बनाए।

यसै गरी गण्डकी प्रदेशले कोशी प्रदेशलाई २–१ ले हरायो। गण्डकीकाका लागि नियुक्तिले कृषा राईलाई ११–२, ११–१ र ११–३ तथा रेनेशाले डोल्मालाई १५–१३, ११–४ र ११–२ ले पराजित गरे। कोशीकी रचनाले भने गण्डकीकी समीक्षालाई ११–७, १२–११ र १४–१२ ले हराएकी थिइन्। 

नेपाल स्क्वास र्याकेट्स संघको आयोजनामा भएको प्रतियोगितामा पुरुष टिम इभेन्टमा बागमती प्रदेश र कोशी प्रदेश फाइनलमा पुगेका छन्। बुधबार भएको सेमिफाइनलमा बागमतीले मधेश प्रदेश र कोशीले प्रदेशले लुम्बिनी प्रदेशलाई समान २–१ ले हराए।

सातदोबाटोस्थिति नेपाल स्क्वास संघको एकेडेमी हलमा भएको सेमिफाइनलमा बागमतीका लागि राकेश परियार र प्रोज्ज्वल प्रधानले जित हात पारे। राकेशले सञ्जीव थापा मगरलाई १२–१०, ९–११, ११–८ र ११–० तथा प्रोज्ज्वले हेलिस घिसिङलाई ११–६, ११–६ र ११–४ ले हराए। पहिलो खेलमा भने मधेशका दीपक थापाले बागमतीका पासाङ ब्लोनलाई ३–११, १२–१०, १३–१ १र ११–५ ले पराजित गरेका थिए।

अर्को सेमिफाइनलमा सुदीपबहादुर सिंहले कोशीका नैनबहादुर मगरलाई पाँच सेट लम्बिएको खेलमा ४–११, ११–५, १२–१४, ११–७ र ११–९ ले हराएर लुम्बिनीलाई अगाडि पारेका थिए। तर त्यसपछिका दुई खेलमा सूर्यकुमार राईले गौरव कटवाललाई ११–७, ११–५, ९–११ र १३–११ तथा खेमराज राईले यम रानालाई ११–६, ११–७, ४–१ १र ११–४ ले हराएर कोशी प्रदेशलाई फाइनलमा पुर्‍याए।