काठमाडौं । इरानमा जारी एएफसी फुटसल च्याम्पियनसिप छनोटको दोस्रो खेलमा नेपालले आज (बिहिबार) बलियो टिम उज्वेकिस्तानसँग प्रतिस्पर्धा गर्दैछ ।
छनोटको पहिलो खेलमा हार व्यहोरेको नेपालले दोस्रो खेलमा उज्वेकिस्तानको सामना गर्न लागेको हो । नेपाल र उज्वेकिस्तानबीचको खेल नेपाली समय अनुसार बेलुका ५:४५ मा सुरु हुनेछ ।
इरानको उर्मियामा नेपाल उज्वेकिस्तानविरुद्ध कम्तिमा अंक खोस्ने योजनामा हुनेछ । तर, छनोटकै सर्वाधिक बलियो मानिएको उज्वेकिस्तानविरुद्ध नेपाललाई सहज भने छैन ।
छनोट पहिलो खेलमा नेपाल ताजिकिस्तानसँग ६-० ले पराजित भएको थियो । उज्वेकिस्तानले पहिलो खेलमा अफगानिस्तानलाई ६-२ ले हराएको थियो ।
छनोटको सेन्टर र साउथ जोनको समूह 'ए’ मा रहेको नेपालले अंक जोड्न सकेको छैन ।
उज्वेकिस्तानपछि नेपालले अन्तिम खेलमा शुक्रबार अफगानिस्तानसँग खेल्नेछ ।
छनोटको शीर्ष टिम फाइनल चरणमा छनोट हुनेछन् । फाइनल चरणको खेल भने फेब्रुवरी २७ देखि मार्च ८ गतेसम्म तुर्कमेनिस्तानमा आयोजना हुनेछ ।
