राष्ट्रिय फुटसल टिमको कप्तानमा विजय

काठमाडौं । पूर्व राष्ट्रिय फुटबल खेलाडी विजय गुरुङले राष्ट्रिय फुटसल टिमको कप्तानी गर्ने भएका छन् ।

इरानमा आयोजना हुने एएफसी फुटसल च्याम्पियनसिप छनोट अघि अखिल नेपाल फुटबल संघ (एन्फा) ले विजयलाई कप्तानको जिम्मेवारी दिएको हो ।

अब विजयले कात्तिक ६ गतेबाट इरानमा सुरु हुने फुटसल छनोटमा नेपाली टोलीको नेतृत्व गर्ने छन् ।

नेपाली टिमका मुख्य प्रशिक्षक विष्णु गुरुङले टिमको कप्तानी विजयलाई सुम्पिएको खेलपाटीलाई बताए । इरान जाने फुटसल टिमको विदाईमा समेत विजयलाई राष्ट्रिय झन्डा हस्तान्तरण गरिएको थियो ।

लामो समय फुटबलमा बिताएका विजयले पहिलो पटक फुटसल टिमको नेतृत्व गर्ने लागेका हुन् । तर, पछिल्लो समय उनि फुटबल टिम बाहिर रहदै आएका थिए ।

आफ्नो कप्तानीमा पहिलो पटक खेल्न लागेका विजयले टिमको तयारी राम्रो भएको र खेलाडीले मेहेनेत गरेको कारण इरानमा राम्रो नतिजा दिने बताए ।

‘मेहनत गरेका छौं । तयारी पनि राम्रो भएको छ । टिमको लागि सक्दो राम्रो नतिजा दिन्छौं । आशा छ, राम्रो नतिजा आउने छ,’ कप्तान विजयले भने ।

यस्तै कप्तान विजयले विदाई कार्यक्रममा खेलाडीको हितमा काम गरिदिन एन्फालाई आग्रह गरे । धेरै फुटसल खेलाडी विदेशिन बाध्य भएको बताउँदै विजयले त्यसको समाधान गर्न आग्रह गरे ।

‘आज मलाई खेलाडीको हितमा बोल्न मन लागेको छ । यहाँ फुटसलको केहि छैन । यसमा कसरी राम्रो गर्न सकिन्छ, त्यसतर्फ ध्यान दिनुहोला । यी भाईहरु पहिला पनि देशका लागि खेले, ४–५ जना बीचमा हराए, अबका दिन यस्तो नआओस् । बाहिरी कुरा सोच्न नपरोस्,' विजयले भने, 'देशमै खेलेर खान सकुन् । जसले गर्दा पछिल्ला दिनमा राम्रो नतिजा आउनेछ ।’

सेन्टर तथा साउथ जोनमा रहेको नेपाल समूह 'ए’ मा रहेको छ । नेपालको समूहमा ताजकिस्तान, उज्वेकिस्तान र अफगानिस्तान रहेका छन् ।

नेपालले ताजकिस्तानसँग कात्तिक ६ गते पहिलो खेल खेल्नेछ । यस्तै नेपालले दोस्रो खेलमा उज्वेकिस्तानसँग कात्तिक ७ गते खेल्नेछ । अन्तिम खेलमा ८ गते अफगानिस्तानको सामना गर्नेछ ।

छनोटको शीर्ष टिम फाइनल चरणमा छनोट हुनेछन् । फाइनल चरणको खेल भने फेब्रुवरी २७ देखि मार्च ८ गतेसम्म तुर्कमेनिस्तानमा आयोजना हुनेछ ।