काठमाडौं । ग्रिनल्यान्डले दोश्रो टोखा प्याब्सन अन्तरविद्यालय छात्र फुटसल प्रतियोगिताको उपाधि शुक्रबार जितेको छ ।
टोखा प्याब्सन र टोखा नगरपालिका वार्ड नं. ८ द्वारा संयुक्त आयोजित प्रतियोगिताको फाइनलमा ग्रिनल्यान्डले हिमालयन भ्यालीलाई ३–२ गोलले पराजित गर्यो ।
ग्रिनल्यान्डको जितमा सविन गुरुङले ह्याट्रिक गरे । सविननै सर्वोत्कृष्ट खेलाडी चुनिए । हिमालयनका रोहन कोइराला र विश्वास श्रेष्ठले १–१ गोल गरे ।
हिमालयनका रविन थापा उत्कृष्ट गोलरक्षक घोषित भए । नेपाल मोडेल अनुशासित टिम ठहरियो ।
विजेतालाई टोखा नगरपालिका मेयर प्रकाश अधिकारी, टोखा नगरपालिका वार्ड नं. ८ का अध्यक्ष केशव खत्री, टोखा प्याब्सनका अध्यक्ष टंकुमार चापागाईंलगायतले एक कार्यक्रमबीच पुरस्कृत गरे ।
प्रतियोगितामा २० टिमले लिग कम नकआउट आधारमा प्रतिस्पर्धा गरेका थिए ।
