काठमाडौं । इनोभेटिभले सातौं उपत्यकाव्यापी रेडिअन्ट कप बास्केटबल प्रतियोगितामा बिहीबार दोहोरो जित हात पारेको छ ।
सिनियर ब्वाइजमा इनोभेटिभले ज्योति एकेडेमीलाई २९–१४ ले पराजित गर्यो । इनोभेटिभका श्रृजल अवालेले १७ अंक जोडे । सिनियर गल्र्समा इनोभेटिभले ग्यालेक्सीलाई १६–१० ले हरायो । इनोभेटिभकी स्वच्छता थापाले ६ अंक जोडिन् ।
सिनियर ब्वाइजमै द एक्सेल्सियरले आयोजक रेडिअन्ट ‘ए’ लाई ३१–३०, ग्रिनफिल्डले अद्वितीयलाई ३६–२७, जेनिअमले एलआरआईलाई २९–२५ र डेनेबले विल्सन एकेडेमीलाई २१–१२ ले पाखा लगाए । एक्सेल्सियरका सुशान्त डंगोलले १२, ग्रिनफिल्डका अमृत भट्टराईले १०, जेनिअमका दीपेश कार्कीले ११ र डेनेबका शम्भु ओझाले ६ स्कोर गरे ।
सिनियर गल्र्सको अन्य खेलमा न्यु भिजनले एक्सेल्सियरलाई १३–५ र एलआरआईले रेडिअन्टलाई १८–१२ ले पन्छाए । न्यु भिजनकी आरती मगरले ७ तथा एलआरआईकी सन्जिला भण्डारीले ६ अंक बटुले ।
जुनियर ब्वाइजमा ग्रिनफिल्डले न्यु भिजनलाई ३०–२०, हिमालयले एलआरआईलाई २४–१२ र रेडिअन्टले सेबलाई ३३–१७ ले पराजित गरे । ग्रिनफिल्डका महेश दाहालले १५, हिमालयका जेन लामाले १० र रेडिअन्टका राज रोकाले १३ अंक जोडे ।
